Tito Miguel

Dear Tito Miguel,

Maayong adlaw kanimo, Tito Miguel. Tawga lang ko og Jazzy, 22 years old ug usa ka call center agent. Nagtubo ko nga uhaw og pagmahal sa usa ka inahan. Lima mi ka magsuon ug ako ang kamaguwangan. Niingon ko nga kuwang ko og pagmahal sa usa ka inahan kay kasab-an gyud ko kanunay sa akong mama. Mura’g wala na lang gyud kog tarong nga nabuhat.

Kaniadto nga teenager pa ko, kun mamarayeg ko niya og bag-ong sinena ug uban pa, dili gyud siya mohatag kay wala kuno mi kwarta. Pero sa akong mga manghud dali kaayo siya mohatag—walay daghang istorya. Gipa eskuyla ko pero two year course ra kay dili kuno kaya sa akong utok. Ambot ba, puros man pagsaway akong nadawat gikan ni mama. Ako man unta siyang inahan pero wala man siyay support nako.

Vibes gyud unta nako akong papa pero patay na siya , Tito Miguel. Unsaon man nako aron maduol ang pagbati ni Mama nako? Ganahan na gyud unta ko nga maka feel nga pinangga ko niya, ilabi na nga wala na akong papa, pero mura’g nagkalayo man hinuon si Mama nako.

Jazzy

* * *

Jazzy,

Kahibulongan ang pagtratar sa imong inahan nimo, labi na kun wa kay sala nga nitukmod niya palayo. It looks like you are not good enough for her. Duna gyud na’y lawom nga rason kay ang inahan sa pagmahal sa iyang anak dili mahubsan. Pasayloa ko, pero dili ba kaha duna’y nagpaluyo nga sikreto sa imong pagkatawo?

Suwayi’g istorya imong inahan, isulti niya tanan nimong gibati ug nasinati sukad sa una, labi na sa imong napanid-an nga lahi iyang tinagdan nimo kumpara sa imong kaigsuonan. Ipadayag nga nunot niini, nagduda ka nga dili siya ang naghimugso kanimo.

Lagmit iyang ilimod ang para niya wala’y kamatuoran. Denial. Apan sa imong pagduda kun diin ka gikan, siya makugang ug dinhi masuta nimo asa taman iyang pagka inahan. Ang inahan makusganong mopaila ug moangkon sa iyang anak, usahay gani mopasaka’g kaso o makigpatay kun kinahanglan.

Kun siya ang imong inahan nga nakahibawo na sa imong duda, lagmit siya makaamgo nga kanimo duna siya’y dakong pagkuwang. Kay ngano gud tawon nga sa taas nga panahon mao na imong nabatyagan? Diha pa mausab iyang tinagdan kun siya mismo makakita sa iyang gibuhat ug wa gibuhat nimo. Kun lahi diay imong inahan, ang tanang rason ngano imo nang masabtan.

Kun siya gyud imong inahan pero di mag usab sa tinagdan, ayaw pugsa kay samot ka masamaran. Ipakita niya tanang buhat nga matarong hangtod masuta niya imong kaligdong. Apan tan-awa sab imong kaugalingon, basin duna ka’y binuhatan sukwahi sa iyang lagda isip inahan. Introspect, before you wonder where is the respect.

Tito Miguel

* * *

Alang sa inyong mga suliran nga buot ninyong patambagan kang Tito Miguel, -i-like ang Banat Hugyaw ug Banat News fb pages aron adto ninyo kana ipadala ug mogawas kini matag Lunes ug Biyernes.