Tito Miguel

Dear Tito Miguel ,

Ako diay si Ressia, nag-work sa usa ka LGU sulod na sa usa ka tuig. Naa na koy boyfriend ug kapin na sa tulo ka tuig ang among relasyon.

Naa gyud  koy problema. Aminado ko nga sala gyud nako kun nganong nag-atubang ko karon og dakong problema.

Sa tinuod lang Tito Miguel, upat ka bulan nako nga nagluib sa akong boyfriend.

Naa koy kauban sa trabaho nga akong kairing-iring.

Nadala gyud ko sa temptasyon, guwapo man gud kaayo ang akong officemate.

Sukad nga duna koy kairing-iring nga lain dili nako ganahan magpasundo sa akong boyfriend, wala ra man sad siya nagduda.

Nakonsensiya nako sa akong gibuhat kay buotan kaayo akong boyfriend. Akong giingnan  akong officemate nga honungon na namo ang among kabuang.

Pero dili siya mosugot, ug gibaharan ko niya nga ibuking ko niya sa mga tawo, iya gyud ipakatap ang tsika kun ako siyang biyaan. Mao na akong dakong problema ron, unsa man akong buhaton, Tito Miguel? —Ressa

Ressia,

Blackmail. Unahi ang bugtong tawo nga iyang gihimong hinagiban aron sa kanunay ikaw makuyawan ug kaniya sunod-sunoran. Sa imong boyfriend isulti ang tanan. Buotan man diay kaayo no less than the truth he deserves to know. Pangayo’g pasaylo kun ikaw sinsero ug  ihatag niya ang katungod paghukom unsa iyang desisyon sa buhat nga imong gikumkom.

Kun iya kang biyaan, ihatag niya ang kagawasan. He doesn’t deserve you, mao ni ang labing importante nga kamatuoran nga angay niyang sayran. Di na nato mistil palawman ngano. Sa iyang pagbiya gawasnon na ka moduyog sa tawo nga kadaghan nihulga nimo. Kay niduwa man ka’g laing team, masusi nimo kun insakto ba inyong tandem. 

Kun iya kang ipaglaban, ang imong lain makuhaan og hinagiban. Kun sa mga tawo iya kang pakauwawan, pasagdi siya sa iyang binuhatan. Gawas nga dili nimo siya mapugngan, sa inyong relasyon walay labot ang katawhan. Ang importante ang imong boyfriend nagpabilin sa imong kiliran.

Mahimo kang ulipon sa blackmail kun magpakita ka sa imong kahuyang nga iyang pahimuslan. Pasagdi siya unsa iyang ibuyangyang kay katunga niini mosumbalik sa kanahan. Ang laing katunga magpabilin kanimo, pero wala kay katungod pagreklamo sa resulta sa pagpangluib nga binuhatan nimo mismo.

Yuna ra, kun kamo duha nagtrabaho sa LGU, buot pasabot naa sa gobiyerno. Ang pagpamugos pinaagi sa hulga kanimo dunay puwede ikaso, apil ang administratibo. Kun gusto ka’g hinagiban nga kaniya mopakgang, duol og abogado aron matun-an legal nga mga lakang.

Kana kun imo siyang suklan. Apan pag-andam kay ang katunga sa iskandalo nunot sa kaso mosumbalik usab kanimo. Suklan o pasagdan, lagmit inyong sikreto sa katilingban mabisto. Perhuwisyo sa buhat nga di maayo.

Tito Miguel

Suliran? I-like ang Banat News ug Banat Hugyaw FB Page  aron adto nimo ipadala ang maong suliran ug kang Tito Miguel atong patambagan.