Tito Miguel

Dear Tito Miguel,

Ako diay si Jenny, usa ka bayot. Ang akong problema kay dali kaayo ko ma inlove og baby boy. One time, nag outing mi sa among barkada sa usa ka resort nailaila nako si Michael. Nag exchange nos. Ug nagfriend mi sa FB. Pero si Michael nilarga sa ilang probinsiya, tungod love nako siya basta naa siyay pangayuon abtik ko makahatag hangtud nakit an nako sa FB naa diay siyay GF. Unsa akong buhaton para dili ko abtik mohatag kun naay pangayuon?

Tambagi ko, Tito Miguel. Salamat kaayo.

Jenny

* * *

Jenny,

Tuki-on usa nato unsa’y imong motibo nga mohatag ka niya. Aron ba lang siya malipay or aron di mopalayo nimo? Kun aron lang siya malipay, siguroa nga ang kalipay kanimo niya makaplag ug dili sa butang nga imong gihatag.

Apan lagmit sa pahalipay siya mahimuot, duna man kaha’y girlfriend tua ra ngadto iyang buot. Wa ka mag hisgot sa iyang sexual preference, pero tataw nga babaye iyang gusto ug dili nimo maski kaniya mogasto.

Kun unsa man imong motibo, dili kini mapatuman sa maski unsang matang sa sustento. Mopalayo gihapon siya kanimo sa ngadto ngadto. Ayaw og kakuntento nga ikaw duolon lamang kay duna pa’y ikagasto. Sa imong kaugalingon dapat una ka morespeto.

Kani nga kamatuoran maoy imong hinagiban aron ka magdumili paghatag. Suwayi og balibad sa sunod pangayo, lagmit gikan nimo modagan palayo. Buot pasabot dili uyab o tawo iyang tan-aw nimo, kun dili supplier lamang sa iyang mga luho.

Kun magpabilin maski nibalibad ka, it is a good sign. But it remains a sign. Balibad gihapon sa sunod hangtod maklaro nimo asa siya taman. Apan lagmit ang primerong balibad inyo na nga utlanan.  

Duna pa’y lain nga posible imong motibo. Aron ba tagdon, panggaon ug lingawon ka niya pinaagi sa pakighilawas isip bawos sa material nga butang nga kaniya imong gibuhos?

Kun kaning uwahi imong motibo, puede man isig gamit mo sa usa’g usa apan ayaw paglaum nga kanimo siya mouli inig kagabhion. Kun makuntento ka ana, puede ra, apan hangtud kanus-a? Gani, kinahanglan na ka moundang kay duna’y sabit, naa siya’y uyab apan kanimo nangabit kay imong gipalit.

Ayaw pamalit og gugma ug pag-amuma pinaagi sa mga butang nga imong ikahatag kay dili kini igo apil pa imong kalag. Love is not a merchandise. It is given free in pure paradise.

Tito Miguel

* * *

Alang sa inyong mga suliran nga buot ninyong patambagan kang Tito Miguel, -i-like ang Banat Hugyaw ug Banat News fb pages aron adto ninyo kana ipadala ug mogawas kini matag Lunes ug Biyernes.