Tito Miguel

Dear Tito Miguel,

Ako diay si Melyn, 30, years old, call center agent.

Naa ko’y uyab, si Vincent, 25 years old ug nag-work sa usa ka construction firm.

Lima ka bulan na among relasyon.

Maulaw baya unta ko mopadala sa akong story kay segurado ko nga moingon ka nga gamay ra gyud kini pero dili man gud ko mahimutang sa simple nako nga uyab.

Wala gyud ko kasabot sa akong kaugalingon , bisan okay na kaayo ang lovelife nako karon, saputon lang gihapon ko kun makadungog ko nga happy ang akong ex-boyfriend nga si John sa iyang new girlfriend.

Kahibalo ko nga wala nakoy katungod nga saputon kay pareho nami sa akong ex nga duna na’y tagsa-tagsa nga uyab.

Unsa imong matambag Tito Miguel para mahimutang akong huna-huna?  Naing-ani ko kay wala ko kalimot sa gibuhat sa akong ex sauna nga iya ko nga gi-ghosting.

Salamat Tito Miguel.

Melyn

* * *

Melyn,

Closure, mao ni imong kinahanglan aron ka mahimutang. Wala ka makabaton niini tungod kay kalit lang siya nahanaw sa imong panan-aw. Sa ghosting, mga pangutana daghan magpabilin. Ngano kalit siya nawala, duna ba ka’y nabuhat nga sala or duna ba siya’y lain nakita. Mao kini mga pangutana’ng nagsalimuang ka’g pangita sa tubag.

Ayaw na paabota nga matubag pa imong mga pangutana. Ang iyang kalit nga makabungog nga kahilom ug ngitngit nga pagkapawong mao na’y motubag sa tanan nimong pangutana.

Simple ra, kanimo nawad-an siya’g gana. Kay maski unsa pa inyong problema iya unta paninguhaon sulbaron kun kanimo nagpabilin siya nga mahigugmaon.

Kay sa iyang lihok klaro nga nawagtang iyang pagmahal, di na ka angay mogukod pa niya aron kini masulti pa niya nimo sa personal. Sa imong kaugalingon ayaw pagpaka-brutal. Lisod sa sugod, apan ang panahon moabaga nimo aron madawat ang inyong kagahapon. Ang imong paglungot lungot karon resulta lamang sa imong gibati nga ikaw naisahan og wa gyud makabawos sa wa’y batasan.

Gusto lang ba ka mobawos ug modaog? Kanaug, ang gugma dili duwa nga sa uwahi duna’y ideklara nga mananaog. Ang gugma dili magkuwenta kinsa’y mas nipangga ninyo sa usa’g usa, ang importante nipangga ka nga wala’y tatsa. 

Timan-i, sama niya duna na ka’y laing uyab karon. Kun sa imong kagahapon ikaw magpabiling ulipon, tabla ra nga imong gi-ghosting imong uyab karon.  Stop agonizing over the ghost of your past, love your present so it will last.    

Tito Miguel

* * *

Alang sa inyong mga suliran nga buot ninyong patambagan kang Tito Miguel, -i-like ang Banat Hugyaw ug Banat News fb pages aron adto ninyo kana ipadala ug mogawas kini matag Lunes ug Biyernes.