Tito Miguel

Dear Tito Miguel,

Tagoa lang ko sa pangalan nga Glory. Usa ako ka part-time college instructor, 55 anyos. Namatay na akong bana.  Ang akong problema karon nga mura’g ma-guilty ko kay aduna koy gikarelasyon karon nga batan-on. Itago lang nato siya sa pangalan nga Anton, 25-anyos.

Pagkamatay sa akong bana, nag-inusara ko sa boarding house, naguol kaayo ko. Hangtod nga nakita nako ang comfort uban ni Anton ug nagka-uyab mi. Karon mura ko’g nagduha-duha nga sayop ba akong gibuhat ug ipadayon ba ni nako. Nanghinaot ko nga imo kong matambagan. Salamat. —Glory

Glory,

Love on the rebound. Dako’g posibilidad kini imong gibati kay ikaw mismo niingon nga nakakita ka’g comfort niya samtang nagbangotan ka sa kamatayon sa imong bana. Depektoso kini kay mahulog nga gigamit ra nimo ang batan-on aron sa kamingaw ikaw maka-move-on. Sultii siya sa tinuod nimong gibati. Kay siya ang dehado, hatagi siya’g kagawasan pagdesisyon kun sa inyong relasyon dili siya magpakandado.

Apan kun nakalabang na ka ngadto sa tiunay nga gugma or tiunay gyud sa sugod pa ug mao sad siya, padayon. Dili sayop ang relasyon provided wala mo’y gitumban nga laing tawo ug sinsero mo sa gibati sa usa’g-usa. Ang imong gikahadlokan kay ang 30 years age gap ninyo. Nag-ihap ka nga inig 75 nimo, siya 45 pa. Mounong pa ba kaha siya nimo, atimanon ba kaha ka niya, mao kini imong mga pangutana.

Undangi’g hunahuna imong kaugmaon niya. Sa imong edad, imong kaugmaon imo nang gitagamtam. Savor the glory days and make the best out of them but do not over-indulge. Pagmatngon, labi na mahitungod sa kuwarta. Likayi nga masagola’g financial consideration inyong relasyon, regardless kun kinsay nagtunol or nidawat ninyong duha. Gawas nga wala’y mamoyboy kun magbuwag mo, sukod usab kini unsay inyong katuyoan sa usa’g-usa.

Stop overthinking what happens way beyond now kay wala sa imong mga kamot kun unsay inyong dangatan ugma. Wala’y seguridad sa tanang matang sa relasyon dinhing kalibotana. Maski kaedad nimo imong karelasyon, walay garantiya nga kini molungtad. Ang imo bitaw bana nitaliwan man og una. Just as wala’y garantiya hangtod kanus-a inyong relasyon karon.

Tinuod, inyong age gap nagbagang red flag. Pero tanang relasyon duna’y bantayanang red flag aron wa’y masaag. Basta kumportable ug malipayon mo, and you make each other better persons, ipadayon ang unsa’y naa ninyo karon. But expect nothing or less aron kun magbuwag mo di nimo ikahilis. Age is a gap, if out of love you snap.—Tito Miguel