Love story

Dear Banat News,

Ganahan  gyud ko basta Martes  na, kay malingaw ko mobasa og  Banat News tungod sa Love Story, ug ako na pud karon ang mo-share sa kaagi nako sa gugma.

Ako diay si Niño John, 26 anyos ug  taga Labangon, Cebu City,  usa ka call center agent. Duna ko’y uyab, iyang name kay Dina, 28 anyos  ug  call center agent pud siya apan lahi nga company.

Nagkaila ming duha ni Dina kay nagkauban mi sa usa ka relief operation.  Puros  man mi volunteer sa usa ka non –government  organization.

Pagkakita nako niya nagsige  ko og pasiplat ug nakabantay siya nako ug moduko dayon siya nga kunohay wala kahalata nga nagsige ko og tan-aw kaniya.

Ambot uy, cute bitaw kaayo si Dina, kon makakita ko niya mawala gyud akong kapoy.  Buotan pa gyud siya nga pagkatawo.

Pareho ming duha aktibo moapil og mga relief operation kay nindot man gud ang feeling nga makatabang ka sa ubang tawo.

Wala gyud ko nagdugay-dugay, nangita gyud ko og paagi nga magkasuod mi hangtud  natuman gyud nako akong giplano.

Walo  ka buwan sa among panag-ilhanay, nagkauyab gyud mi ni Dina,  ug sama sa ubang relasyon, nag-agi pud mi og mga away-away.

Dunay mga panahon nga magsige mi og away tungod permi siyang busy. Dili gyud ko mahimutang kon dugay ko replayan ni Dina.

Tungod sa akong kahigpit, giprangkahan ko ni Dina nga magbuwag na lang mi kay gikapoy na siya og sige’g lalis.

Siyempre, dili ko ganahan magbuwag mi nag-usab gyud ko sa akong kaugalingon nawala na ang akong pagkaseloso ug pagkahigpit kaniya.

Nausab gyud ko kay dili ko ganahan mawala si Dina sa akong kiliran. Kay dugay na man ang among relasyon, nadala gyud mi sa tentasyon ug nahitabo gyud kini sa dihang nag-overnight mi sa usa ka resort.

Kami ramang duha unya nakainom sad mi gamay maong natintal gyud mi. Mibunga gyud ang among gibuhat, namabdos gyud si Dina.

Wala nako talikdi  ang akong responsibilidad ako gyud gibarogan ang among gibuhat. Pag-una lagot kaayo ang ginikanan ni Dina kanako. Pero nadawat ra pud ko nila pagkadugayan kay  nakita nila nga naningkamot gyud ko ug wala nako pasagdi ang ilang anak.

Nanganak si Dina niadtong April, ug usa kini ka baby girl.  Sunod tuig, plano namo nga magpakasal.  Lipay kay ko kay bisan mag-away mi, dali ra gyud kini masulbad. Siguro kon love ninyo ang usa’g-usa, kinahanglan dili gyud magpadala sa mga pagsulay. Mo-request lang ko sa lyrics sa The Old Songs by David Pomeranz .

Hi Niño John! Thank you so much sa imong LOVE STORY! Paabuta ugma puhon ang imong request

Dear HUGYAWnatics, aduna ba kamo’y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa.

Mahimo sab nga pinaagi sa snail mail. Ang atong address mao kini:

Love Story C/o Banat News