Away ni Mathysse basihan ni Pacquiao kun moretiro na ba o dili
CEBU, Philippines – Si Pinoy boxing superstar Manny Pacquiao nagkanayon nga ang resulta sa umaabot nilang away ni Lucas Matthysse maoy iyang basihan kun hingpit na ba niyang tak-opon ang tabil sa mabulokon niyang karera.
Human sa usa ka tuig nga pahuway, ang 39-anyos nga si Pacquiao mokatkat og balik sa ring aron hagiton ang WBA welterweight champion nga si Matthysse karong Hulyo 15 didto sa Kuala Lumpur, Malaysia.
Matud ni Pacquiao nga dili pa siya makasulti kun mao na ba kini ang katapusan niyang away, apan seguradong mao kini ang iyang sukdanan kun moretiro na ba siya o dili sa boksing.
Si Pacquiao nakasakmit na og walo ka titulo sa managlahing dibisyon, apan ang iyang mga kritiko apil na si Matthysse nga manghud niya og upat ka tuig ang mikuwestiyon sa iyang abilidad nga maka-boksing pa sa susamang kabangis ug kabagsikon nga iyang gipakita sa nangaging katuigan.
Sa katapusan niyang away, si Pacquiao nahuboan sa iyang bakus isip WBO welterweight champion human gipilde ni Jeff Horn sa Australia pinaagi sa controversial decision.
- Latest
