Team Pacquiao gisaytan si Lomachenko
CEBU, Philippines — Ang impresibong performance ni Vasyl Lomachenko wala makapausab sa tinguha sa kampo ni Manny Pacquiao nga makasangka ang Ukrainian star sa umaabot.
Matud pa sa adviser ni Pacquiao nga si Mike Koncz ngadto sa Philstar.com, nga pabor gihapon siya kaayo nga iparang si Pacquiao batok ni Lomachenko human sa makapakurat niining kadaogan batok ni Jorge Linares niadtong Domingo.
Si Lomachenko nga usa karon sa labing banggiitan nga pound-for-pound boxers sa kalibotan, nakabangon human sa kalit nga pagkatumba sa ikaunom nga hugna aron pagpakatug ni Linares pinaagi sa usa ka makusog nga suntok sa tiyan sa ika-10 nga hugna aron paghari isip WBA lightweight champion.
Mao kadto ang ikatulo niyang world title sa managlahing weight division ug iya kining nakab-ot sud lamang sa 12 ka away.
Sa iyang bahin, si Pacquiao todo-ensayo karon alang sa umaabot niyang paghagit ni WBA welterweight champion Lucas Matthysse karong Hulyo 15 didto sa Kuala Lumpur, Malaysia.
Giklaro sa 39-anyos nga si Pacquiao nga kun ugaling modaog siya batok ni Matthysse, hayan nga sunod niyang sangkaon mao si Lomachenko karong Nobiyembre. (BANAT NEWS)
- Latest
