Arum wala nang pakialam kay Pacquiao

MANILA, Philippines — Kung ang promotional contract ni Manny Pacquiao sa Top Rank Promotions ni Bob Arum ang pag-uusapan ay natapos na ito sa huling laban ng Filipino world eight-division champion noong Hulyo kontra kay Jeff Horn sa Brisbane, Australia.

Ito ang sinabi ni Atty. Eldibrando Viernesto, ang legal counsel ni Pacquiao, sa isinulat ni Aquiles Zonio sa Philboxing.com.

“I reviewed the contract and I found out that Bob Arum has no more say even in the rematch, should there be any, between Manny Pacquiao and Australian boxer Jeff Horn,” wika ni Viernesto.

Kaya naman wala nang pakialam si Arum sa pagsagupa ni Pacquiao (59-7-2, 38 KOs) kay  Lucas Matthysse (39-4-0, 36 KOs) ng Argentina sa Hunyo 24 sa Kuala Lumpur, Malaysia.

Sinabi ni Zonio, ang media officer ng 39-anyos na Senador, na nakatakdang dumating sa bansa sina Matthysse at Oscar De La Hoya ng Golden Boy Promotions sa Abril 4 para sa formal announcement ng naturang laban.

“Dela Hoya called up asking me if we could reset the Manila launching after the Holy Week. That’s why it was moved to April 4,” sabi ni Pacquiao.

Nauna nang inilagay ni Arum ang comeback fight ni Pacquiao laban kay dating Mexican world light welterweight titlist Mike Alvarado (38-4-0, 26 KOs) sa undercard ng title defense ni Horn (18-0-1, 12 KOs) kontra kay American mandatory challenger Terence Crawford (32-0-0, 23 KOs) sa Abril 14 sa Mandalay Bay Resort & Casino sa Las Vegas, Nevada.

Ngunit tinanggihan ito ni Pacquiao.

Ayon kay Zonio, sinubukang isabotahe ni Arum ang bakbakan nina Pacquiao at Matthysse sa pamamagitan ng pagtawag sa mga Malaysian financial backers ng nasabing laban.