Sa bar - Gula 18

Igo lang mitutok si Diane sa iyang inahan dayon milingiw ngadto sa laing direksiyon

"Usbon ko, Diane, gisultihan mo ba si lola mo mahitungod sa pagpakigrelasyon ni kuya mo ngadto sa babaye nga naa magtrabaho sa bar?" pagsubli ni Mylene sa iyang pangutana ngadto sa iyang anak dalaga miyamiid si Diane, misulimbat ang mata nagpakita sa kamaldita.

"Di ba miingon man ka nako mihangyo  nga dili nako sultihan si lola? Wala nako siya sultihi," ni Diane pa.

"Sigurado ka?" pulong pagduda ni Mylene.

"Bakakon na lang gyud diay ko? Lakaw adtoa si lola, pangutan-a kun ako ba siyang gisultihan ingna kun naa ba koy gisulti niya mahitungod kang kuya nga nag uyab-uyab og usa ka burikat," matud pa ni Diane.

"Unsa? Tarunga ra gud nang baba mo Diane kun manulti ka mura ka'g wala makatungtong og eskwelahan wala ka baya namo pa-eskwelaha aron mamulong og dili maayo sa imong isigka-ingon," matud pa ni Mylene nga medyo na-irita sa tuno ug sinultihan sa anak. Mannerism ni Diane ang mangyamiid midugang sa pag-ingon si Mylene, "huna-hunaa kuno kun sundon ko ang imong giingon nga pangutan-on ang imong apohan nga misulti ka ba niya nga nakigrelasyon si kuya mo Kyle sa usa ka babaye nga naa sa club magtrabaho mura ra sad og ako mismo ang misulti niya."

"Naa ra man diay na," matud pa ni Diane nga mibarog ug mipalayo sa nahimutangan sa inahan ug miingon, "adto ko sa akong kuwarto oy."

"Dili ka mopauli sa apartment? May klase ka ugma," pangutana ni Mylene.

"Dah, dili ko ganahan mopauli kay naa si kuya sa apartment momata na lang ko'g sayo ugma magtaxi ko paingon sa eskwelahan," ni Diane pa dayong lahos sa iyang kuwarto.

Naglingo-lingo na lang si Mylene nagpakita na sa iyang bati nga batasan si Diane. Nakapangutana si Mylene kun diin kini maliwat dili man unta siya salbahis wala sab siya’y nailhan sa iyang kaliwat nga susama ka maldita ni Diane. Si Ferdie pud nga iyang bana buotan man sab kini lawom nga nanghupaw si Mylene, nahuna-huna niya ang ugangan nga babaye.

Nakaingon na sab sa hunahuna, basin tua maliwat ang anak sa iyang lola nga si Senyora Conchita. May pagkamapalabi-labihon ang ugangan ngadto sa mga tawo nga naa sa ubos niini og kahimtang.

Niadtong adlawa, wala mosulod sa klase si Mylene sumala sa nahisgotan sa unahan, usa ka maestra si Mylene sa usa ka pampublikong tulonghaan. Usa na sab siya ka master teacher gusto gani unta ni Ferdie nga paundangon ang asawa sa iyang pagka-maestra, apan lagi kay passion ni Mylene ang pagtudlo wala’y nahimo ang bana. Kaniadto kanunay nga mag ergo ang duruha apan si Senyora Conchita kanunay’ng dapig ni Mylene moingon man sab nga dili pugson ang asawa nga paundangon sa propesyon niini.

Taas kayo og pagtan-aw ang senyora sa susama kang Mylene nga usa ka magtutudlo. Mao kini ang propesyon nga gustong kuhaon unta niini sa dihang nag-eskwela kini sa kolehiyo, apan ang mga ginikanan sa senyora maoy nagbuot nga commerce ang kuhaon niini kay lagi kaliwat man ang pamilya og usa ka negosyante. Unya, nahunahuna ni Mylene nga makigkita gyud kang Pia sa gipuy-an niini toltolon ang address nga gihatag sa anak.  Alas tres sa hapon mahuman ang iyang klase sa usa ka pampublikong tulonghaan sa Lapu-Lapu City ug molahos na lang kini ngadto sa gipuy-an ni Pia sa may Mandaue City.

Ala una sa kaadlawon pa lang diha na si Kyle sa atbang sa gitrabahoan ni Pia nag-atang sa babaye wala wad-a ang panan-aw ngadto sa pultahan sa bar aron makita dayon niya ang gihigugma kun mogawas na kini.

Tuod man wala siya mapakyas miabli ang pultahan sa club ug nakita ang babaye, apan mura’g giduslak sa makadaghang higayon ang lalaki dihang may lalaki nga misunod sa pagawas, miagbay kini kang Pia, samtang tam-is kaayo'g pahiyom ang dalaga nga mikidhat pa sa lalaki nga hamtong. Nagpangagot ang ngipon ni Kyle ug nagpangumo gustong duolon ang duha. (Sumpayan)