Ang gamay’ng imahen ni Senyor Santo Niño sa basurahan

Sugilanon - Fred Fuentes Monternel (Banat) - January 12, 2015 - 12:00am

Nagduso sa badibadi niyang karomata nga kabilin sa mitaliwan na niyang basurerong amahan, gisayo na usab pagdumdom ni Joshua ning buntaga ang gihimong tambakanan og mga basura sa usa ka barangay sa siyudad, nga hakuton sa garbage truck uban ang mga garbage collector sa barangay, inigka-alas-9 sa buntag.

Kanunay’ng unhan ni Joshua ang garbage truck nga mohakot sa tambak nga mga basurang di-malata. Sa edad nga 20 ug nagpabiling ulitawo, nabuhi siya sa pagpamasura sa siyudad ug kanunay’ng mamasin sa pagsuroysuroy sa kadalanan nga makakuha og mapuslan ug mahaling mga basura sa suking junk shop sa siyudad.

Nagkalingaw dayon sa pag-ukay si Joshua sa di malatang tambak nga basura. Unya, nahaungot ang iyang panan-aw sa iyang naukayan. Usa ka gamay’ng imahen ni Senyor Santo Niño. Gipunit dayon ni Joshua ang gamay’ng imahen sa milagrosong bata. Ingon sa kumo sa gamay’ng bata ang gidak-on niini. Iyang gitrapohan sa trapo niyang panapton ang gama’yng imahen ni Senior Santo Niño. Nabag-o kining tan-awon. Migilak. Nakapahiyom si Joshua nga hugot mitutok sa gamay’ng imahen nga iyang gikuptan.

“Senyor Santo Niño dad-on ko ikaw sa gipuy-an kong barungbarong sa eskuwater! Ibutang ko ikaw sa gamay kong altar! Tabangi ko Senyor Santo Niño nga makakuwarta ko atol sa imong kapistahan ugma nga makapalit og kunsumong pagkaon alang sa kabos kong pagpakabuhi!” mahigugmaon nga gihagkan ni Joshua ang gamay’ng imahen ni Senyor Santo Niño ug gisulod sa bulsa sa iyang karsones. Padayon siyang nangukay sa tambak nga mga basurang di-malata. Unya, kalit nga may migimaw nga kapeng sobre. Gipunit ni Joshua ang kapeng sobre. “Uy, bagal man kaayo kining sobreha! Nasagol man ning sobre nga malata man unta ning basuraha...!” ni Joshua nga maikagon kaayong miukab sa nagbagal nga sobre. Nahasiga ang iyang mga mata. Tagsok sa langking tibuok tagsa ka libo ka pesos ang sulod sa sobre. Giihap ni Joshua. Bayente ka buok! Bayente mil pesos!

Lagsik nga mitulod si Joshua sa iyang karomata nga daw naglutaw sa hangin sa tumang kalipay. Giluklok niya ang bagal nga kapeng sobre sa pikas bulsa sa iyang karsones nga uran. Unya, gikuot niya sa pikas bulsa ang gamay’ng imahen ni Senyor Santo Niño nga karon pa lang niya nakabkaban sa basurahan. Migilaw ang imahen sa Balaang Bata nga hugot gitutokan ni Joshua. Daw nagpahiyom kaniya. Nakatuaw si Joshua.

“Salamat Senyor Santo Niño! Gitubag mo dayon ang gipangayo ko nimo. Sadya ang akong Pista Senyor ugmang adlawa! Pit Senyor! Viva Senyor Santo Niño...!” ug nag-atras-atras ang pagtulod ni Joshua sa iyang karomata niadtong buntaga. (Kataposan)

IYANG JOSHUA PLUSMN SANTO SENYOR SENYOR SANTO NI UNYA
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with