COA misita sa P4.45- million honoraria sa Lapu-Lapu City
CEBU, Philippines — Gikwestyon sa Commission on Audit (COA) ang paggasto sa Lapu-Lapu City Government og P4.445 milyon nga honoraria alang sa artistic, creative production, event organization ug media services nga wala moagi sa gitakdang proseso sa procurement.
Sa 2025 audit report, miingon ang COA nga ang maong mga serbisyo kinahanglang moagi sa Negotiated Procurement ubos sa Section 53.6 sa implementing rules and regulations sa Republic Act 9184.
Matud sa COA, ang pagbayad pinaagi sa honoraria nakalikay sa mga pamaagi sama sa pag-validate sa presyo sa merkado, negosasyon ug ebalwasyon. Wala usay dokumentong nagpakita nga ang kantidad nga gibayad gitandi sa kasamtangang presyo sa maong mga serbisyo.
Girekomendar sa audit team nga gamiton sa siyudad ang hustong procurement process sa susamang mga serbisyo ug undangon ang paghatag og honoraria kon ang trabaho kinahanglan moagi sa pormal nga procurement.
Sa iyang tubag, miingon ang OIC-Tourism Officer, kinsa usab ang Special Disbursing Officer sa maong cash advances, nga naglihok ang ilang opisina in good faith base sa executive order sa mayor ug sa pag-apruba sa mga hingtungdang opisina. Apan giila sa opisyal ang panginahanglan sa hustong procurement process ug misaad nga maghimo og mga lakang aron masunod ang balaod.
- Latest




















