Alzheimer’s awareness gipadangat ngadto sa mga senior citizens

CEBU, Philippines —  Mokabat sa 1,200 ka senior citizens sa Lapu-Lapu City ang miapil sa mga kalihokan nga nagtutok sa Alzheimer’s awareness, mental health ug healthy aging isip kabahin sa selebrasyon sa Elderly Filipino Week 2026 ug Alzheimer’s Awareness Day.

Matud ni Mayor Ma. Cynthia “Cindi” King-Chan, padayon nga paningkamotan sa city government nga mahimong accessible ang mga serbisyo alang sa mga senior citizens ug matubag ang ilang mga panginahanglan, ilabina tungod sa ilang mga kontribusyon sa pamilya ug komunidad.

Gipahigayon ang kalihokan niadtong Oktubre 1 sa Hoops Dome sa Barangay Gun-ob ug gi-organisa sa Lapu-Lapu City Government uban sa National Commission of Senior Citizens (NCSC) Region VII.

Gidala niini ang tema nga, “Mga Katigulangang Pilipino: May Bili ug Katungod, May Tingog ug Padayong Nagtampo sa Nasod,” nga nagpasiugda sa katungod, dignidad ug padayong kontribusyon sa mga senior citizens.

Matud ni NCSC-7 Regional Director Jocelyn Tabotabo, gitumong usab sa selebrasyon nga matabangan ang mga senior citizens ug ilang mga pamilya nga mabantayan ang mga timailhan sa Alzheimer’s disease ug dementia.

“Senior citizens still have value and make important contributions to the country. Our activity today is not just to inform seniors about the information and signs, but also to discuss programs and prevention measures for Alzheimer’s disease and dementia,” matud ni Tabotabo.

Matud pa niya, ang mas lapad nga kahibalo bahin sa kondisyon makatabang sa mga pamilya sa pag-ila sa mga warning signs, pagpangayo dayon og medical advice ug pagsabot kon unsaon pag-atiman sa mga paryente nga adunay dementia.

Gipangutana usab ni Tabotabo ang mga partisipante kon unsaon pag-atubang sa mga pamilya ang kahimtang kung moabot ang panahon nga dili na nila mailhan ang ilang mga minahal tungod sa maong kondisyon.

Gawas sa mga diskusyon, miapil ang mga senior citizens sa Elderly Line Dance Exercise ug mental health talk nga gipahigayon sa National Mental Health Development Office.

Naghatag usab og libreng serbisyo ang City Health Office, lakip ang memory screening, medical ug dental consultations, health information, prescription services ug pag-apod-apod og mga tambal.

Gitabangan usab ang mga senior citizens sa PhilHealth YAKAP registration, samtang available usab ang PSA mobile services ug mga diskusyon bahin sa dementia ug senior mental health pinaagi sa mga partner agencies.

Gipahibawo usab sa city government ang Republic Act No. 11982 o ang Expanded Centenarians Act, nga naghatag og P10,000 cash gift sa mga Pilipino sa pag-abot nila sa edad nga 80, 85, 90 ug 95.

Gisuportahan ang kalihokan sa City Social Welfare and Development Office, Office of Senior Citizens Affairs, PhilHealth, Commission on Filipinos Overseas, mga national government agencies, Cebu Provincial Government, non-government organizations, health professionals ug pribadong partners.