Tito Miguel

Dear Tito Miguel,

Usa ko ka inahan. Gitarung nako og buhi ang akong duha ka mga anak arun ugma damlag makaplagan nila ang kaharuhay sa kinabuhi. Ang kamagwangan lalaki. Gibuhat nako ang tanan isip single mom aron makahuman siya og skwela. Naputos ko sa utang arun makahuman lang gyud siya arun ugma damlag siya na pod ang magpa eskwela sa iyang igsuon nga babaye. Naka graduate na tuod siya ug akong dakong kalipay. Karon seaman na siya apan ang nakapasubo nako kay nagminyo na dayun siya. Wala ko maguol nga naminyo siya dayun kay iya man nang kalipay apan ang ako lang unta, iyang dumdumon ang pagpa eskwela sa iyang igsuon. Karon gipasagdan naman lang mi niya nga iyang pamilya ug tua na mi focus sa iyang asawa ug sa bag o niyang pamilya. Wala pa silay anak apan masakitan ko sa panahong makadungog nga mas buhong niya ang pamilya sa babaye matag panahong mo uli siya. Nag sustento sya namo og P5,000 kada bulan. Dako mang kulang kay nag tungha napod iyang igsuon nga babaye sa kolehiyo. Wa ba koy katungod nga mo demand niya nga unta iya lang pahumanok ang iyang igsuon? Mas nagsakit ang akong buot kay murag layo na kaayo siya namo kay ultimo sa sustento namo, adto pa ko manghangyu sa babaye. Salamat ug tambagi ko.

Rose

* * *

Rose,

Duna ka’y katungod, obligado ang pamilya pag suporta sa usa’g usa subay sa Family Code. Ang kantidad nga mapugos siya’g hatag depende sa iyang kakayahan ug sa inyong lehitimo nga panginahanglan. Konsulta’g abugado aron sakto’ng mapalawman ni kanimo. Naghisgot ka’g katungod, tingali duna ka’y plano’ng remedyo ubos sa balaod.

Apan ang legal nga lakang aron mapugos imong anak pag suporta ninyo ngil-ad paminawon kay unta ihatag kini’ng bukal sa kabubot-on. Dili maayo ang pamilya magkinihaay tungod sa sustento, sigurado inyong relasyon madiskwedo.

Inay nga mobuhat ka’g legal nga lakang, suwayi’g storya imong anak, klarohi siya nga dili igo iyang sustento ninyo og dili nimo kaya mag inusara’g suporta sa iyang manghod. Hangyoa ka usa, pasagdi unsa iyang ikagasa.

Ayaw pamoyboy, hangyo lang sa inyong igong sustento, ayaw ibalik imong pag-antos niya kaniadto kay ang pagpa-eskuwela niya ikaw obligado. Iyang pagtagad ninyo ug sa pamilya sa iyang asawa ayaw itandi kay madamay ang inosente. Sa iyang kunsensya pasagdi siya.

Sa laing bahin, kinahanglan iyang manghod maninguha matabangan iyang kaugalingon. Ang pagdumili’g suporta sa iyang kuya hagit kaniya aron siya mobarug para sa iyang kaugmaon. Mahimo siya mag working student o scholar.

Kun wa na ka’y laing kadangpan kun dili legal nga lakang, ang imong gipuntirya simang. Ang angayan pasakaa’g kaso ang katunga sa hinungdan ngano imong anak nahimugso niining kalibotan, wala’y lain kun dili iyang amahan.

Tito Miguel

* * *

Alang sa inyong mga suliran nga buot ninyong patambagan kang Tito Miguel, -i-like ang Banat Hugyaw ug Banat News fb pages aron adto ninyo kana ipadala ug mogawas kini matag Lunes ug Biyernes.