Naglatagaw sa huna-huna

Naglatagaw sa akong huna-huna ang pangutana kun hain kaha karon naglatagaw ang tulo ka Chiong convicts nga gipagawas sa prisohan tungod sa Good Conduct Time Allowance (GCTA).

Wala ba pud kaha maglatagaw sa huna-huna sa tulo ka Chiong convicts ang pangotana kun mobalik pa ba sila pagsulod sa prisohan human gimando ni Presidente Rodrigo Duterte ang pagpabalik sa prisohan niadtong mga nakagawas human nakapahimulos sa GCTA uban sa hulga nga kun dili mobalik sa pagsulod sa prisohan sulod sa kinse (15) ka adlaw ipapatay sila?

Sigun sa balita miabot na sa 76 ka mga heinous crime convicts ang mibalik na sa prisohan apil na niini ang lima (5) dinhi sa Sugbo nga mitahan sa ilang kaugalingon sa kapolisan human sa kamandoan sa Presidente.

Human gimando ni Presidente Rodrigo Duterte ang pagpabalik pagsulod sa prisohan sa mga piniriso nga nakagawas kay nakapahimulos sa GCTA wala ba pud kaha maglatagaw sa iyang huna-huna ang pangutana kun balido ba o legal ang iyang gipagawas nga kamandoan?

Sigun sa Republic Act Number 10952 o Good Conduct Time Allowance law dili na puyde nga mabakwi o mabawi sa gobiyerno ang nahatag na nga GCTA ngadto sa mga nakapahimulos niini.

* * *

Naglatagaw pod sa akong huna-huna hangtod karon ang pangutana kun giunsa paglikay ni Atty. Inocencio Dela Cerna sa daghang bala nga mitama sa iyang sakyanan human siya gibanhigan sa gawas nga bahin sa Palacio sa Hustisya sa may North Reclamation Area sa dakbayan sa Sugbo.

Seguro ang pagka hinimbahon ug ang pagka relihiyoso sa abogado ang nanagang sa mga bala nga gusto unta nga mohunos sa iyang kinabuhi.