Comeback fight ni Pacquiao mapinalisar na
CEBU, Philippines — Lagmit mapinalisar na karong semanaha ang ‘comeback’ fight ni Manny Pacquiao nga tentatibong gitakda karong Abril 14 sa usa ka ‘pay-per-view’ card didto sa Madison Square Garden sa New York.
Segun sa taho ni Lance Pugmire sa Los Angeles Times, ang promoter ni Pacquiao nga si Bob Arum nagplano nga mopasundayag sa WBO welterweight title defense ni Jeff Horn batok sa wa’y pildeng kanhi junior welterweight champion nga si Terence Crawford ug iyang isukip si Pacquiao sa undercard.
Ang 39-anyos nga si Pacquiao (59-7-2, 38KOs) wala na makaaway pa sukad siya gihuboan og bakus ni Horn niadtong Hulyo 2 sa miaging tuig didto sa Brisbane, Australia.
Nag-una sa lista aron makaharong ni Pacquiao sa iyang pagkatkat og balik sa ring mao ang Mehikanong si Mike Alvarado (38-4, 26 KOs), kanhi junior welterweight title challenger.
Apan gumikan kay sumasaop naman ang karera ni Alvarado, seguradong kataw-an sa mga fans ang maong tapad kay kulatahon lamang siya ni Pacquiao.
Lain opsiyon aron iparang ni Pacquiao mao si WBA welterweight champion Lucas Matthysse, apan ang problema kay si Matthysse ubos sa Golden Boy Promotions nga dugay nang gikasungi sa Top Rank ni Arum.
Apan sa mga mata sa matchmaker, mas nindot kun si Alvarado maoy iparang ni Pacquiao kay dako man og purohan nga ang Pinoy ring star makaiskor sa labing una niyang knockout sukad niadtong 2009. (BANAT NEWS)
- Latest