Sexy 35

CEBU, Philippines — Seventeen years old na diay ang anak nga lalaki ni Jamila Obispo, ug niya pa, nakasabot kini sa iyang pagpa sexy sa mga pelikula sa VivaMax. Single mom si Jamila, ug nasulod siya sa showbiz pinaagi sa unang Pinoy Big Brother Teen Edition diin si Kim Chiu ang nidaog. Thirty-five years old na si Jamila, ug sa dugay na niyang pagpaabot, nag-anam na ka nindot ang iyang mga projects sa showbiz human siya nihukom nga magpa sexy pinaagi sa VivaMax. Biggest break niya ang umaabot nga series nga Huwag Mong Agawin Ang Akin, kauban sila si Angela Khang ug Felix Roco, sa direksyon ni Mac Alejandre.

Dili pa matapos uy

Sukwahi sa mga huhungihong nga matapos na ang FPJ’s: Ang Probinsyano, adunay gipagawas nga teaser ang Dreamscape Entertainment nga mas daghan pang angayang atangan gikan sa maong teleserye ni Coco Martin. “Sa pagdating natin sa ika-pitong taon, hatid namin sa inyo ang mas kaabang-abang pang mga gabi sa #FPJsAngProbinsyano,” caption sa teaser nga puros nawong ni Coco ang gipakita nga naporma og number seven sa katapusan. Niining bag-o lang, labing bag-ong personalidad nga nisulod sa maong serye si Charo Santos Concio.

Wala nay post

Gi-delete ni Jeric Gonzales ang tanan niyang post sa Instagram. Suma pa sa mga marites, daw gikapoy na si Jeric human sa gikatahong panagbuwag nila ni Rabiya Matteo. Sa sinugdanan, may usa ka picture siya nga gibilin, apan sugod niadtong Domingo, naa pa ang account pero zero post na. Ang tsika, gi-block ni Jeric sa instagram  si Rabiya. Apan ang ubang netizens, deadma na, kay matud pa puol na ang away-amigo na pud nga mugna nila ni Rabiya kaniadto. Buot pasabot, mag-away ug mag-uli ra pud. Unya mag-away na pud.

Baby number two

Mabdos si Solenn Heussaff sa ikaduhang anak nila ni Nico Bolzico. Kini maoy gipahibawo sa magtiayon kagahapon pinaagi sa ilang Instagram Reel. Sa video, makita nga daw adunay gisuwayan nga bag-ong app si Solenn, apan lahi ang nigawas nga resulta kay nagpakita kini nga adunay bata sa iyang sabakan. Gikalipay kaayo sa ilang mga higala ang maong balita. Si Nico ug Solenn gikasal didto sa France niadtong 2016. Nag-edad na og duha ka tuig ang ilang anak nga si  Thylane Katana.

Mga banggiitan

Dakong kalipay ang gibati karon ni Heaven Peralejo gumikan kay makatrabaho niya sa usa ka pelikula ang mga banggiitan nga sila si Ian Veneracion ug Mon Confiado. Gibalita ni Heaven ang maong kalambuan pinaagi sa iyang Instagram account niining bag-o lang. Gisaad niya ngadto sa iyang fans nga buhaton gyud niya ang tanan aron dili sila madismaya sa ilang makita puhon. Gawas niini, nalakip sab si Heaven sa sexy drama series ni Ivana Alawi nga The Family Affair.

Makamingaw

Gimingaw si Rochelle Pangilinan sa iyang mga co-stars sa Lolong, ang bag-ong action-adventure series sa GMA7 nga gibituonan ni Ruru Madrid ug nagsugod na sa nilabay nga semana. Asoy pa ni Rochelle, nag-lock in taping sila taliwala sa pandemya busa daghan kaayo siya og mga kabalaka, ilabi na nga may pamilya siya nga gibiyaan ug gikamingawan og maayo. Maayo na lang niya pa kay walay mga labad sa mga ka trabaho niya, ug nagkasinabot ra sila kanunay hinungdan nga napadali ang ilang mga trabaho bisan pa og bug-at ang mga eksena. Isip pasalamat, gilutuan matud pa niya ang iyang mga katrabaho. Karon nga humana og himo nila ang mga serye, gimingaw siya sa iyang mga nakauban sa lock in taping, hinungdan nga gikomedyahan pa siya sa iyang bana nga si Arthur Solinap nga daw mas gusto niya sa taping kaysa ilang balay.

Blooper ni Regine

Trending si Regine Velasquez niadtong Domingo sa Twitter human nga nagtuwad ang iyang microphone sa dayon niyang sugod sa duet nila ni Jason Dy sa kanta nga In Love With You, sa ASAP Natin To. Dali ra sab hinuon niya kining natarong. Mismo si Regine, klaro kaayo nga nagpugong sa iyang katawa ug nipadayon og kanta. Apan pagkahuman, ni-tweet gyud siya nga nagkanayon: “Wala naman nakapansin diba? [laughing emoji] #ehyungbaliktadmicko [laughing emoji] wag kayo maingay ha hay”. Dinhi na nagbaha ang mga reaksyon, kasagaran nila nalingaw sa blooper ni Asia’s Songbird.

Buot-buot

Giangkon ni Ariel Rivera sa presscon sa iyang teleserye sa GMA7 nga The Fake Life niining bag-o lang nga magmugna sab gyud siya og lyrics basta makalimot siya. Mahitabo matud pa kini kun aduna siya'y concert. “Tumutugtog yung music, e. Hindi mo naman puwedeng sabihing, ‘Stop the music!’So you fake your own, you make up your own lyrics.” Niya pa nga nagkatawa.

Moving on theme song?

 ‘Ang sakit pag akala mo tadhana, 'tapos kailangan lang pakawalan muli.’ Lyrics na sa umaabot nga kanta ni Moira dela Torre nga iyang gipaambit atol sa Idol Philippines niadtong weekend. Nahitabo ni dihang usa ka contestant ang nibutyag nga kalit na lamang nakigbuwag niya ang iyang partner. Dinhi na nipaambit si Moira—kinsa usa sa mga hurado—sa maong linya. Apan ang pangutana karon sa mga marites, moving on theme song ba ang umaabot nga kanta ni Moira, human sa panagbuwag nila sa iyang bana nga si Jason Hernandez?