Nadine, go; Bea, no sa usa ka ex...

CEBU, Philippines — Managsama sila si Bea Alonzo ug Nadine Lustre nga andam makigtrabaho sa ilang mga ex-boyfriend. Ang kalainan lang kay adunay usa ka ex si Bea nga dili siya buot makigtrabaho.

Kini maoy iyang gibutyag sa pilot episode sa Youtube channel ni Barbie Forteza diin si Bea ang unang guest. Wala nganli ni Bea kinsa nga ex ang iyang pasabot, apan special mention niya si Zanjoe Marudo.

Suma pa niya, kun si Zanjoe, andam kaayo siya nga makigtrabaho sa actor sanglit maayo man ang ilang panagbulag niadtong 2016, ug maayo gihapon ang ilang tinagdanay hangtud karon.

“Depende kung sinong ex. Kay Zanjoe [Marudo], okay akong makipag-work. Depende sa ex. Isa lang naman yung ayaw kong ex.” Nagkanayon siya sa Coffee Talk with Barbie Forteza.

Nasayud usab matud pa siya sa iyang kapasidad isip aktres ug sa iyang limitasyon aron nga dili malain ang iyang hinigugma nga si Dominic Roque.

Samtang si Nadine sa interview sa PEP, niingon nga andam sab siya nga makigtrabaho kang James Reid sa usa ka acting project. Gani, magkatrabaho man sila karon sanglit usa man siya sa unang mga talents sa Careless Music, ang music label ug talent management company nga gipanag-iya ni James.

 "Let's see. Hindi ko kayang magsalita nang patapos because there are so many possibilities." Nagkanayon si Nadine.

Kanunay nga atua si Nadine sa Siargao sanglit atua didto ang iyang iyang hinigugma nga si Christophe Bariou, kinsa nanag-iya og restaurant sa maong isla.

Dihang gipangumusta sa PEP ang estado sa iyang kasingkasing karon, nagkanayon ang award-winning actress: I'm good, I'm happy. It's different. I wouldn't say mas okay or mas di okay, but it's different.”

Congratulations, Captain RI ug Yoon Se-Ri!

Mabdos na si Son Ye-jin sa unang anak nila ni Hyun Bin. Ang Korean superstar mismo maoy nipahibawo niini sa nilabay nga adlaw pinaagi sa Instagram.

Suma pa sa bida sa Korean top series nga Crash Landing On You, angayan na niyang mas magmatngon pa sanglit aduna nay bag-ong kinabuhi nga niabot kanila sa iyang bana nga si Hyun Bin.

Gikasal ang duruha ka mga bida sa maong sikat kaayo nga series niadtong March 31, 2022, pinaagi sa usa ka private wedding didto sa South Korea.

Nalipay kaayo ang mga fans sa duruha sa maong balita. May mga nikomedya sab nga hingigo gyud diay si Captain Ri. Captain Ri Jeong Hyeok ug Yoon Se-Ri ang ngalan sa mga karakter sa duruha sa Crash Landing On You.

Nataypan ba?

Wala gitago ni Herlene “Hipon Girl” Budol nga ang Miss Grand International crown maoy iyang target human siya nahimong opisyal nga kandidata sa Bb. Pilipinas karong tuiga.

Dako kaayo kining hagit alang kang Herlene sanglit wala pay Pinay nga nidaog niining maong titulo masukad.  Niadtong 2013, ang pambato sa Pilipinas nga si Annalie Forbes, nitapos isip 3rd runner-up. Human sa duha ka tuig, subling na 3rd runner-up ang pambato sa Pilipinas pinaagi kang Parul Shah. Pagka sunod tuig, o niadtong 2016, first runner-up ang pambato sa nasud nga si Nicole Cordovez.

Niadtong 2017, second runner-up si Elizabeth Clenci ug niadtong 2020, subling naangkon sa Pilipinas ang first runner-up sash pinaagi kang  Samantha Bernardo.

Apan si Hipon Girl, masaligon nga kun makuha niya ang nasudnong titulo alang niini, aduna siyay kahigayonan sa international title. Kay matud pa sa mga beauty pageant observers, ang personalidad ni Hipon, maoy gipangita sa presidente sa maong pageant organization nga si Nawat Itsaragrisil.

Ug niining bag-o lang, dinhi sa nasud si Nawat kay nitambong sa usa ka event sa Bb. Pilipinas. Dinhi nakakita og higayon si Hipon nga ipadayag ngadto kang Nawat ang iyang tinguha nga mamahimong labing unang Pinay nga makoronahan nga Miss Grand International. Kini pinaagi sa iyang introduction. Ug daw, malampuson ang diskarte ni Hipon sanglit gi-my stories ni Nawat sa Instagram ang introduction sa nahisgutan nga kandidata. Hinungdan nga nagpasalamat si Herlene ug nag-upload og hulagway nila ni Nawat nga kuha atol sa nahisgutang Bb. Pilipinas event.

Obvious ba?

Kun ang mga hulagway nila maoy basehan, daw dili na pangutana kun aduna bay relasyon sila si Kobe Paras ug  Erika Portunak.

Si Kobe, 24, mao ang basketball player nga anak nila ni Benjie Paras ug Jackie Forster. Si Erika, 20, anak ni Ina Raymundo ug Brian Portunak.

Niadtong June 15, 2022, unang nilugwa ang sweet photos nilang duruha samtang nagbakasyon sa beach.

Ug niadtong June 28, sunod-sunod ang mga hulagway nga gi-upload ni Kobe nga kuha didto sa Bali, Indonesia, diin kasamtangan silang nanlaag ni Erika, kauban ang ilang mga higala.

Wala pa silay kumpirmasyon sa ilang relasyon, apan ang mga marites, niiknat ang kilay og nagkanayon: pangutana pa diay na? Ka klaro ana!

Managsama silang single sa wala pa nilugwa ang ilang sweet photos online.