EDITORYAL - Preparasyon angay seryusohon

Gialerto ang tanang local government units aning pag-abot sa bagyong Betty nga dunay international name nga Mawar. Layo ra hinuon kaayo kini tungod toa kini sa lawod sa Pasipiko sa sidlakang bahin sa Luzon atol ning pagsuwat.

Ang ubang mga LGUs nanagana og maayo kay ang uban misuspenso gyud sa mga klase sa ilang mga eskuylahan, duna say mga lungsod nga gipasirado una ang ilang mga  tourist spots aron dili mahasol ang mga turista kun maabtan og dautang panahon sa maong mga dapit.

Ang nagkadaiyang LGUs miposisyon na sa ilang mga kahimanan ug ekipo nga gamiton sa emerhensiya, apil na niini ang mga heavy equipment nga gamiton kun gikinahanglan, mga relief goods ug emergency kits giandam na sab aron mapadala dayon unya kun dunay mobakwit.

Luyo aning preparasyon, dunay mihangop kay nanagana daan ang ilang mga LGUs, apan duna say uban nga miingon nga overacting ra ang ilang mga opisyales kay layo ra lagi ang maong bagyo.

Ang Mawar gikonsiderar na kagahapon nga usa ka super typhoon samtang nagdagan sa kadagatan sa utlanan ra gyud sa Philippine Area of Responsibility padung sa amihanan.

Ang gihimo sa mga LGUs angay dayegon kay nakat-on na sila sa mga leksyon sa nanglabay nga mga bagyo partikular ang mga super typhoons sama sa Yolanda ug ang labing bag-o mao ang Odette.

Angay hinumdoman nga kaning duha gipangandaman sab og maayo kaniadto dili lang sa LGUs kondili hasta sa nasudnong kagamhanan.

Gi-mobilized ug gi-preposistion daan ang tanang mga tawo ug mga gamit gikinahanglan, apan gumikan sa kabangis sa duha, gilamon ra ang gihimong preparasyon ug daghang nangamatay ug nangaguba, nagbilin kini og kadaut nga hangtud karon duna pay uban wala makabangon.

Mao nga dili angay biay-biayan ang pagpangandam sa gobiyerno matag dunay taliabot nga bagyo kay duna pay oras ang tanan aron mamenus-menusan ang negatibong epekto niini dili lang sa mga imprastraktura kondili hasta pud sa kinabuhi sa mga tawong maagian.