S.I.V, Aiperon napilde na gyud sa Hoops Arlon Cup

CEBU, Philippines — Ang S.I.V ug Aiperon International Fighters nakatilaw na gyud og pilde sa Hoop Nation Arlon Cup Season1 niadtong weekend didto sa City Sports Club-Cebu gym. Gibuntog ang S.I.V sa DMY Events, 66-69, samtang ang Aiperon miyukbo sa Gonzalodo Enterprises, 55-61.

Si Jeff Michael Gudes mipupo og 28 puntos, unom ka rebounds ug pito ka assists alang sa DMY Events nga milayat ngadto sa solong liderato sa West Division bitbit ang 8-1 win-loss record. Mihipos si JP Yu og 16 puntos apan way nahimo gumikan kay napakgang ang pito ka sagunson nga daog sa S.I.V. Si Hope Gideon mitimbre og 18 puntos, unom ka rebounds ug duha ka steals sa dihang ang Gonzalodo nakigduyog sa Prayboys sa ikaupat nga puwesto sa West bitbit ang parehong 6-3 nga baraha.

Samtang si Amir Batiancila miposte og 14 puntos ug tulo ka steals apan nakawang ang iyang paningkamot gumikan kay naputol ang unom ka sunod-sunod nga daog sa Aiperon. Wala sab magpa-alkansi si Jonas Mejos nga mikolekta og 19 puntos, 11 ka rebounds ug duha ka blocks sa dihang giwani sa Team Kobe ang Cougars, 59-53, aron sa pagdayon niining paghari sa East uban ang 9-1 nga marka.

Sa duha ka kulbahinam nga engkuwentro, ang Cebuanos nakaipsot sa Pfizer, 60-59, samtang ang 5 Joints nakaeskapo sa AEG, 43-42.

Si Bennick Selana mipaulbo og 30 puntos uban ang lima ka rebounds ug lima ka assists sa dihang gitabla sa Cebuanos ang ilang record ngadto sa 5-5 samtang si Mario Abinoman mihipos og 14 puntos, tulo ka rebounds ug tulo ka assists aron pangulohan ang 5 Joints ngadto sa ikaupat nilang daog nga giatbangan og susamang gidaghanon sa pilde.

Sa laing bahon ang Trojan Warriors mipukan sa Punisher, 61-57. Si John Paul Banono mirehistro og 22 puntos, walo ka steals ug tulo ka assists alang sa Trojan Warriors nga midaog sa ikapitong higayon sud sa 11 ka duwa.