Fajardo mi-aswat sa Beermen ngadto sa solong liderato

CEBU, Philippines — Nadepensaan og maayo, ang Sugbuanong higante nga si June Mar Fajardo nangita og laing paagi aron makatabang sa iyang team.

Iya kining gibuhat pinaagi sa paglangkat og mga offensive rebounds ug pagpasa og maanindot nga mga assists sa dihang gibuntog sa San Miguel Beer ang Rain or Shine, 99-93, niadtong Miyerkules sa gabii didto sa Smart Araneta Coliseum.

"Pinapahirapan nila ako tumanggap sa shaded lane, so decoy muna," dason pa ni Fajardo human gitabangan ang Beermen pag-angkon og balik sa solong liderato sa PBA Philippine Cup bitbit ang 5-1 win-loss record.

Nalimitahan man tuod ngadto lamang sa 10 puntos, ang six-time MVP gikan sa lungsod sa Pinamungajan, Cebu nakahimo gihapon og impresyon uban ang 16 ka rebounds, pito ka assists ug tulo ka blocks alang sa Beermen, nga mipatilaw sa Elasto Painters sa ikalima niining sagunson nga pilde.

"Set screens muna at kuha ng offensive rebounds, at maganda naman nilaro ng lahat ng mga teammates ko," dugang pa ni Fajardo.

Si CJ Perez mikuha sab ang atensiyon uban ang 21 puntos ingon man sila si Marcio Lassiter ug Rodney Brondial nga mihipos og 16 puntos matag usa.

Sila si Jericho Cruz ug Simon Enciso nagkumboya og 26 puntos sa balanseng ataki sa Beermen.

"We have a lot of injured players, and I'm happy for the guys, who aren't seeing much action, na nag-contribute nung nagamit sila," matud pa ni San Miguel coach Leo Austria.

"No one is afraid to take the shot. Lahat wanted to contribute," dugang pa ni Austria agi'g pagdayeg sa iyang mga sakop nga mikumbati og maayo samtang wala pa ang upat ka injured nilang mga players nga sila si Moala Tautuaa, Chris Ross, Vic Manuel ug Terrence Romeo.