Westbrook pabilin sa Lakers, Kyrie Irving mobalik sa Nets

CEBU, Philippines — Ang duha ka NBA superstars nga sila si Russell Westbrook sa LA Lakers ug Kyrie Irving sa Brooklyn Nets magpabilin sa tagsa-tagsa nila ka mga koponan sa umaabot nga 2022-23 season sa liga. 

Si Westbrook, ang 2017 MVP, nakahukom nga gamiton ang opsiyon niyang $47.1 million aron mobalik sa Lakers.

Ang 33-anyos nga si Westbrook, nga siyam ka higayon nahimong All-Star, mosud sa katapusang kampanya sa lima ka tuig niyang kontrata nga mibalor og $206 million.

Si Westbrook miduwa alang sa upat ka lain-laing teams sa miaging upat ka seasons. Mi-average siya og triple-double sud sa tulo ka tuig sa Oklahoma City Thunder sa wala pa siya gi-trade ngadto sa Houston Rockers puli ni Chris Paul niadtong 2019.

Nagsugod si Westbrook sa iyang kampanya sa Rockets niadtong 2020-21 season apan go-trade sab dayon siya ngadto sa Washington Wizards niadtong Disiembre 2020. Nagpabilin siya sa Wizards hangtud nga gi-trade na sab ngadto sa Lakers niadtong Agosto 2021.

Sa miaging season, si Westbrook mi-average og 18.5 puntos, 7.4 rebounds ug 7.1 assists sud sa 78 ka duwa uban sa Lakers, nga nagkagidlay bitbit ang 33-49 record hinungdan nga wala maka-abante sa playoffs.

Sila si Westbrook, LeBron James ug Anthony Davis nagka-uban sud lamang sa 21 ka duwa. Sa maong mga higayon, ang Lakers miposte og 11-10 nga baraha.

Ang Lakers nanghinaut nga makabangon sunod season ubos sa bag-o nilang coach nga si Darvin Ham.

Sama ni Westbrook, si Irving nagpahigot sab sa Nets gamit ang $37-million niyang player contract option alang sa sunod nga season.

Nakahukom ang 30-anyos nga si Irving nga tapuson ang upat ka tuig niyang kontrata sa Nets ug maka-uban gihapon ang higala niyang si Kevin Durant.

"Normal people keep the world going, but those who dare to be different lead us into tomorrow. I've made my decision to opt in. See you in the fall," dason pa ni Irving nga mipawong sa mga intriga nga mohawa siya sa Nets.

Sa kinatibuk-an, si Irving nakapakita og aksiyon sud lamang sa 103 ka duwa uban sa Nets sa miaging tuig ka tuig tungod sa injury ug uban pang mga isyu apil na niini ang pagdumili niya pagpabakuna batok sa Covid-19.

Bisan pa sa presensiya nilang Irving ug Durant, ang Nets miposte lamang og 44-38 recordd sa miaging season diin sila gi-sweep sa Boston Celtics sa unang hugna sa playoff.