RonBucz kampiyon sa CYBL U16 Division 1

CEBU, Philippines — Gilampaso sa RonBucz-A ang Future Basketball Academy (FBA), 85-69, sa tinagakay nilang kampiyonato aron langkaton ang korona sa Division 1 sa Cebu Youth Basketball League (CYBL) Under 16 Summer Showcase nga gi-presenta sa MVP Sports Foundation ning bag-ohay pa lamang didto sa Cebu City Sports Institute. Si Know The Culture MVP Khian Panerio maoy nangu sa RonBucz uban ang 18 puntos ug lima ka assists. Naka-angkon siya og igong suporta gikan ni Kenneth Cole nga mihipos og 14 puntos ug ingon man ni John Louie Bual nga mipupo og 13 puntos, pito ka rebounds, lima ka assists ug tulo ka steals.

Sila si Panerio ug Cole naapil sab sa Mythical Five kauban sila si Chedreyc Benitez sa FBA, Alden Cainglet sa CHBC-Juniors ug Jireh Caro sa A1.

Ang RonBucz, ubos sa pagtimon ni kanhi University of the Visayas (UV) Green Lancers star guard Ronald Bucao, mi-arangkada dayon pagsugod sa duwa hinungdan nga miposte kini og sayong 19-10 nga labaw luyo sa pagpanginit nilang Panerio, Kent Castro ug John Louie Bual. Nakabawos ang FBA tungod sa pagpaningkamot nilang Louiegee de los Angeles ug Jances Anacta apan sila si Cole ug Jhunrel Dagatan miratsada sab dayon aron pagmintinar sa 10 puntos nga labaw sa RonBucz msa halftime, 38-28.

Ang RonBucz nagmangtas og maayo sa ikatulong kuwarter diin sila milusad og nagkayong 30-17 rally pinaagi nilang Panerio, Bual ug Benedict Paca aron pagpaburot sa ilang labaw ngadto sa 24 puntos. Wala na nila paginhawaa pa sukad niadto ang FBA. Si Anacta maoy nangu sa FBA bitbit ang 15 puntos samtang si De los Angeles mi-iskor og 13 sa pilderong kawsa.

Sa sangka alang sa ikatulong dapit, si Cainglet mipabuto og 25 puntos uban ang walo ka rebounds aron ituboy ang CHBC-Juniors ngadto sa 83-78 nga kadaogan batok sa A1. Gipaluyohan siya ni Jelomar “Bull from Bantayan” Rota nga mikolekta og 17 puntos, 16 ka rebounds ug tulo ka blocks.

Si Mikyle Legarde mitali og 14 puntos ug 11 ka rebounds alang sa A1 apan si Caro naposasan ngadto lamang sa dos puntos.