San Miguel Beer namawi, gilubong ang Converge

CEBU, Philippines — Dali nga nakabawi ang San Miguel Beermen sa miagi nilang kaparotan sa Barangay Ginebra ug gipahimungtan sa ilang kayugot ang Converge FiberXers nga ilang gilat-an og 19 puntos, 111-92, sa PBA Philippine Cup niadtong Dominggo sa gabii didto sa Ynares Sports Center sa Antipolo.

"We motivated ourselves right after that loss," matud pa ni San Miguel coach Leo Austria diin ang gipasabot mao ang 75-72 nilang pagkasugamak sa Ginebra nga nakapakgang sa tulo nila ka sagunson nga daog niadtong Biyernes.

Si CJ Perez mirehistro sa labing unang triple-double sa iyang karera uban ang 15 puntos, 13 ka rebounds ug 12 ka assists alang sa Beermen.

Wala sab magpabitin si Jericho Cruz nga mipatuasik og 22 puntos sa labing nindot niyang salida sul-ot ang uniporme sa San Miguel ug ingon man ang Sugbuanong six-time MVP nga si June Mar Fajardo nga mipupo og 18 puntos ug 16 ka rebounds.

Gawas ni Fajardo, si Moala Tautuaa mikadlit sab og double-double uban ang 19 puntos ug 10 ka rebounds alang sa Beermen nga nakigsawo na karon sa liderato uban sa Ginebra bitbit ang managsamang 4-1 win-loss records.

Si Marcio Lassiter miposa og tulo ka 3-pointers sa iyang 12 puntos samtang si Michael Canete midugang og 10 puntos, duha ka rebounds ug duha ka assists sa balanseng ataki sa Beermen.

Ang Beermen wala na molingi pa sukad mibulhot ngadto sa sayong 28-16 nga labaw. Ila pang gitiawasan ang Converge sa ikaduhang kuwarter aron paburoton ang ilang bentaha ngadto sa 23 puntos sa halftime, 62-39.

Wala na makaginhawa pa sukad niadto ang Converge hinungdan nga nakatilaw sa ikaupat nilang pilde sud sa unom ka duwa.