Purefoods milangkat unang titulo sa PBA 3x3
CEBU, Philippines — Gipakaging sa Purefoods Titans ang TNT Tropang Giga, 20-16, aron dominahon ang Leg 6 sa PBA 3x3 Third Conference niadtong Dominggo didto sa Robinsons Place Manila.
Si Joseph Eriobu mipabuto og 11 puntos aron pangulohan ang Titans ngadto sa labing una nilang korona sa PBA 3x3.
Dako sab og naambag sila si Jed Mendoza, Jun Bonsubre ug Marvin Hayes alang sa Purefoods, nga mibulsa og P100,000 sa pagpanghawod nila sa katapusang leg sa dili pa ang conference Grand Finals.
“Sabi ko sa kanila, kung sino’ng mas gutom na team, yun ang mananalo dito. Nag-commit naman lahat sila sa (finals) game para makuha namin ito,” matud pa ni Hayes, nga kanhi sakop sa First Conference champion Limitless sa wala pa mitapon sa Purefoods human siya miduwa uban sa Gilas Pilipinas 3x3 sa Southeast Asian (SEA) Games.
Ang Titans mitikang sa finals human gipangtagak ang Platinum Karaoke, 21-15, ug Meralco, 19-17.
Samtang ang TNT mi-abante human gipalagpot ang Cavitex, 21-16, ug Limitless, 18-16.
Ang Tropang Giga nga gilangkoban nilang Almond Vosotros, Lervin Flores, Samboy de Leon ug Ping Exciminiano nakadawat og P50,000 sa paglahiluna nila sa ikaduhang dapit.
- Latest
