RCBC Gamsi, Amigos 2-0 na sa Amicis caging

CEBU, Philippines — Ang RCBC Gamsi ug Amigos miposte sa ikaduha nilang sagunson nga daog sa 30-above division sa Amicis Basketball League (ABL) Season 2 didto sa Tayud barangay gym sa Consolacion.

Si Louie Malagar mitagak og 21 puntos uban ang upat ka rebounds ug duha ka assists sa dihang gipatilaw sa RCBC Gamsi og pilde ang Bornfree , 87-82.

Miamot si Nino Pilapil og 20 puntos samtang si Louie Bio midugang og 11 puntos alang sa RCBC Gamsi.

Nangu sa Bornfree mao si Jerry Singson uban ang 24 puntos samtang sila si Mark Gestopa ug Ritbon Piezas nagkumboya'g 31 puntos sa pilderong kawsa.

Sa laing bahin, si Christian Conde mikolekta og 15 puntos, siyam ka rebounds ug unom ka assists, si Filhart Suson mi-iskor og 14 samtang si Raniel Capangpangan midonar og 12 puntos sa dihang gipayaka sa Amigos ang YYBC, 99-85.

Si Kobe Ponce mipaulbo og 33 puntos apan nakawang ang iyang paningkamot sa YYBC.

Sa ubang mga resulta, ang Legendary mibuntog sa Gemini, 87-83, samtang si Alfa Wanbatz milubong sa Casili Residences,  82-67.

Sila si Jake Menoza, Brian Calzada ug James Tudtud nagkumbinar og 41 puntos alang sa Legendary samtang si Kirt Reuyan maoy bida sa Alfa Wanbatz bitbit ang 18 puntos, upat ka rebounds ug lima ka asissts ug gisundan kini ni Noah Armean nga dunay 15 puntos.

Wala sab magpabitin si Rex Tuazon nga mipatuasik og 35 puntos, siyam ka rebounds ug pito ka assists aron ituboy ang Miners ngadto sa 102-90 nga pagpakaging sa Persecutors.

Si Tuazon gipaluyohan nilang Alvie Alviola ug Japeth Pitogo nga nagkatigum og 33 puntos.