Caitom nakakaplag og bag-ong kalipay

CEBU, Philippines — Una siyang mihimo og pangan isip usa ka tang-an nga amateur boxer nga nakasakmit og unom ka national titles ubos sa poder sa tinamod nga ALA Gym.

Mahimo dayon siyang pro apan human sa pipila ka away, si Rey Caitom, Jr. temporaryong mibiya sa boksing aron mangindahay sa Singapore diin siya nagtrabaho isip boxing trainer ug fitness sud sa kapin sa us aka dekada.

Human sa 12 ka tuig nga way kisaw isip boksidor, nakahukom siya nga mokatkat og balik sa ring.

Si Caitom mikuha dayon og atensiyon human iyang gipakamang ang Indon nga si Frans Damur Palue sa ikaduhang hugna aron langkaton ang korona isip WBC Asia Boxing Council Continental minimumweight champion niadtong Septiembre 29, 2019.

Apan napakyas siya sa iyang kampanya alang sa World Boxing Foundation (WBF) minimumweight title sa dihang gipalukapa siya sa kababayan niyang si ArAr Andales sa iyang homecoming fight niadtong Marso 9, 2020 didto sa Robinsons Galleria Cebu.

Mao kini ang ang nakapugos ni Caitom ang isab-it ang iyang mga gloves sa ikaduha ug katapusang higayon.

Mao sab kini ang nakapa-aghat kaniya nga mobalik sa lungsod niyang natawhan sa hingpit.

Napundo sa mga pangandoy, si Caitom mikuot dayon sa iyang tiniguman aron tukoron ang Caitom Boxing Fitness Gym didto sa Cordova, Cebu diin siya nagpuyo na kauban ang kapikas niyang si Hazel ug ang nagtubo  nilang pamilya.

Sa tanan niyang mga nakab-ot nga dungog, si Caitom nakakaplag og bag-ong kalipay isyp referee ug judge.

Ning bag-ohay pa lamang, si Caitom mi-officiate sa una niyang championship fight diin nagkumbati sila si Criztian Pitt “Golden Boy” Laurente sa General Santos City ug Richard Bulacan sa Davao City alang sa GAB Youth super featherweight belt niadtong Hunyo 18 didto sa Mobo, Masbate.

"Naka decide ko nga mag-professional referee and judge para ma-share nako ang ako mga experience ug labaw sa tanan for the love of boxing gyud ni ang ako," kanayon pa ni Caitom.

Gikan sa usa ka amateur standout ngadto sa usa ka champion boxer, trainer, gym owner ug karon reperi na, nakumpleto na gyud ni Caitom og tuyok ang iyang karera sa boksing.

Ning puntoha, si Caitom determinado kaayo nga tabangan ang mga batan-ong boksidor sa ilang dapit nga bairon og maayo ang ilang abilidad ug giyahan sila aron makab-ot ang ilang mga damgo sa kinabuhi ugma damlag.

"My goal is to help young kids especially those who aspire to become a boxer one day. I really want to give back to the sport that helped made me what I am now today," dason pa ni Caitom.

Basi sa iyang mga naagian, si Caitom nakakat-on og mga mahinungdanong leksiyon sa kinabuhi nga gusto niyang ipaambit sa uban.

"Akong advice sa mga boxers nga mag-save gyud once naa sila money aron maabot nila ila goals in life like house and lot or business investment para once mo-retire na sila sa boxing naa gihapon sila income alang sa ilang daily needs kay ang kwarta dali ra kaayo gastuhon but lisod pangitaon," panapos pa ni Caitom.