NM Roque nanghawod sa CEPCA Prexy Jerry chessfest

CEBU, Philippines — Si National Master Merben Roque maoy milugwa nga kampiyon sa Cebu Executives and Professionals Chess Association (CEPCA) Prexy Jerry Open Tournament niadtong weekend didto sa Barracks Chess Club sa Robinsons Galleria Cebu.

Gihuman ni Roque ang siyam ka hugna nga kompetisyon uban ang labing taas nga 8.0 puntos aron sakmiton ang titulo ug ang P5,000 nga ganti.

Sila si Richard Natividad ug Anthony Makinano parehong miposte og 7.5 puntos apan si Natividad maoy mipahiluna sa ikaduhang dapit kortesiya sa mas taas niining tiebreaker.

Sila si Roque ug Natividad parehong mga sakop sa Toledo City Trojans nga kasamtangang mikumbati sa Professional Chess Association of the Philippines (PCAP) SGM Wesley So    Cup.

Sila si Cyril Ortega, NM Rogelio Enriquez Jr., Cephas Seguisabal, ug NM Arnolito Cadiz ang mi-okupar sa ikaupat ngadto sa ikapitong dapit bitbit 7.0 puntos matag usa.   

Naglangkob sa top 10 mao sila si  John Dave Lavandero, Jose Fernandez, ug NM Jerish John Velarde uban ang 6.5 puntos.