Adebayo bida, Heat 2-1 na

CEBU, Philippines — Si Bam Adebayo mipabuto og 31 puntos uban ang 10 ka rebounds, unom ka assists ug upat ka steals sa dihang gipahagba sa Miami Heat ang Boston Celtics, 109-103, aron pag-angkon og 2-1 nga bentaha sa best-of-seven NBA Eastern Conference Finals kagahapon didto sa TD Garden sa Boston, Massachusetts.

Ang Heat mikolapso human nakalabaw og 25 puntos sa first half, 62-37, hinungdan nga nakasikit ang Celtics ngadto na lang sa usa ka lugas, 93-92, sa 3-pointer ni Jaylen Brown sa nahibilin nga 2:40 sa duwa.

Apan si Max Strus milansang og krusyal nga tres ug dayon si Adebayo mipasud og buzzer-beater aron pagpabangon og balik sa Heat dayon na ngadto sa sayes puntos nga kadaogan. "Those last couple of games, my team depended on me and I didn't show up," matud pa ni Adebayo nga mi-average lamang og otso puntos sa nag-unang duha ka duwa sa serye. "I took it upon myself to lock in and get the win."

Ang Heat mipayaka sa Celtics bisan og wala na makabalik og duwa ang alas nilang si Jimmy Butler kay mihubag ang tuong tuhod sa first half.

Wala sab hinoon katiwas og duwa ang duha ka mga bitoon sa Celtics nga sila si Jayson Tatum ug Marcus Smart kay nanga-angol sab. Si Brown mipabuhagay og 40 puntos samtang si Al Horford mikimada og 20 puntos ug 14 ka rebounds alang sa Celtics nga nanghinaut makatabla sa Game 4 karong Martes didto gihapon sa ilang korte.