Curry, Warriors giwani si Doncic ug ang Mavs

CEBU, Philippines — Si Stephen Curry mikuha dayon og atensiyon sa gihang gilampaso sa Golden State Warriors si Luka Doncic ug ang Dallas Mavericks, 112-87, sa pasiunang duwa sa ilang best-of-seven NBA Western Conference Finals kagahapon didto sa Chase Center sa San Francisco, California.

Dominado kaayo sa Warriors ang duwa diin sila wala na molingi pa sukad miposte og 54-45 nga bentaha sa halftime.

Misamot pa ang kainit sa Warriors sa ikatulong kuwarter diin ilang gilat-an ang Mavs, 34-24, aron pag-inat sa ilang labaw ngadto sa 19 puntos.

Wala pa matagbaw, giablihan sa Warriors ang katapusang kuwarter pinaagi sa pagtali og walo ka sagunson nga puntos aron pagpaburot sa ilang labaw ngadto na sa 27 puntos, 96-69, nga nakapabarag sa Mavs sa nahibiling bahin sa duwa.

Kay hayag na kaayo ug dili na kapugngan ang ilang kadaogan, si Warriors coach Steve Kerr mipalingkod na sa iyang mga starters sa pinal nga singko minutos sa aksiyon.

Si Curry mikolekta og 21 puntos, 12 ka rebounds ug upat ka assists sa 25 puntos nilang demolisyon sa mikagar nga Mavs.

Dako sab og natampo sila si Jordan Poole ug Andrew Wiggins nga parehong mirehistro og 19 puntos alang sa Warriors nga mao gihapon ang mo-host sa Game 2 karong Sabado.

Si Doncic maoy nangu sa pilderong Mavs uban ang 20 puntos.