Cougars mikadlit unang daog sa Hoops Arlon Cup

CEBU, Philippines — Ang Cougars mirehistro sa una nilang daog human gibihag ang kanhi way pildeng AEG pinaagi sa sikit nga desisyon, 66-64, sa Hoop Nation-Arlon Cup Season 1 didto sa City Sports Club-Cebu gym.

Si John Michael Balingit mihaw-as og 20 puntos, 10 ka rebounds ug duha ka blocks alang sa Cougars nga mipakgang sa upat ka sagunson nilang malas samtang gipatilaw ang AEG sa una niining pilde human sa impresibong 4-0 nga sinugdanan.

Sa ubang mga duwa, ang Trojan Warriors ug Simple Blends parehong miinat sa ilang record ngadto sa 3-2.

Ang Trojans Warriors milampornas sa Brothers, 70-45, samtang ang Simple Blends mipaksit sa Tera, 78-64.

Si Boboy Minesterio maoy nangu sa Trojan Warriors uban ang 19 puntos, pito ka rebounds ug duha ka assists samtang si Glad Ygay ang bida sa Simple Blends bitbit ang 21 puntos, 13 ka rebounds ug usa ka steal.

Sa laing resulta, ang Cebuanos mipayaka sa Gonzalodo Enterprises, 73-66, alang sa ikaduha nilang daog sud sa lima ka duwa.

Si Benick Selana mihipos og 24 puntos, unom ka rebounds ug upat ka assists alang sa Cebuanos.

Ang tulo ka bulan nga torneyo giorganisa ni Adrian Dy nga maoy nagtukod sa Hoop Nation niadtong 2015.