William Go mihimo'g kasikas sa FIA Karting Academy

CEBU, Philippines — Ang tadhan nga Sugbuanong karter nga si William John Riley Go mipamatuod nga angayan siyang morepresenta sa Pilipinas sa Fédération Internationale de l'Automobile-Karting European Championships human siya mitapos sa ikaduhang dapit sa FIA Karting Academy Trophy Round 1 niadtong weekend didto sa Genk, Belgium.

“Receiving the opportunity to represent the Philippines in the FIA Karting Academy was a dream, but finishing on the podium as P2 (second place) for the season's first race is an even greater one,” suwat pa ni Go sa iyang Facebook page.

Andam na unta kaayo ang 14-anyos nga si Go nga mokumbati didto sa Uropa niadto pang 2020 human gidominar ang pipila ka mga dagkong lumba sa Asya apan temporaryong nadiskaril ang iyang mga plano tungod sa pagulbo sa kalibutanhong pandemiya.

Ang duha ka tuig nga pahuway wala hinoon makapakgang sa tinguha ni Go nga gukdon ang iyang mga damgo.

Sa dihang nabalik na sa normal ang sitwasyon, si Go nag-training dayon gawas sa nasud aron bairon og balik ang iyang abilidad agig pangandam sa malisud nga karera didto sa Belgium.

Wala hinoon makawang ang paningkamot ug sakrispiyo ni Go gumikan kay nalandig siya sa ikaduhang dapit sa labing una niyang salida didto sa Uropa. Si Arthur Dorison sa France maoy mi-okupar sa unang puwesto samtang si Guillaume Bouzar sa Luxemburg mitapos ikatulo.

“Different from other karting races in Europe, the FIA Academy tries to deliver sporting equality among drivers. Chassis and engine are identical for every participant. The engines are swapped regularly per race or heat so it's quite a thrill not knowing what to expect,” paambit pa ni Go, nga naka-angkon og 28 puntos padung sa ikaduhang hugna sa torneyo.

“I have so many emotions rushing through me, but one thing is certain, I am truly grateful and happy. All the trials and challenges that occurred over the past races have come to fruition.”

"I dedicate this win to my home country, the Philippines and the Almighty Father. I want to thank everyone who continuously trust and support me. My family, my team, my management team, my coach, my school, and everyone who guided me along the way. A huge thank you," panapos pa ni Go.