Engkuwentro sa way pildeng mga kampiyon

Magsayo gimandoan sa WBC nga modepensa batok ni Vargas

CEBU, Philippines — Si Mark "Magnifico" Magsayo lagmit manalipod sa iyang WBC featherweight title sa labing unang higayon batok ni top-ranked contender Rey Vargas sa Mexico.

Kini human ang WBC pinaagi sa presidente niining si Maurico Sulaiman nimando sa bag-ohay pang gikoronahang kampiyon nga si Magsayo nga modepensa sa iyang bakus batok ni Vargas, nga kanhi naghari sa WBC super bantamweight division sud sa tulo ka tuig gikan sa 2017 ngadto sa 2020.

Ang 26-anyos nga si Magsayo misakmit sa korona sa WBC human gipalayas si Gary Russell, Jr. sa iyang trono pinaagi sa majority decision unom ka adlaw ang milabay didto sa Borgata Hotel Casino and Spa sa Atlantic City, New Jersey.

Human gibihag si Russell, si Magsayo mipadayag sa iyang kaandam nga makigsangka ni bisan kinsa nga buot mohagit kaniya.

"I’m willing to fight anybody. I’m a champion now,” deklara pa sa garbo sa Tagbilaran City, Bohol.

Sa iyang bahin, si Vargas malipayon sa tsansa nga makaharong si Magsayo ibabaw sa ring.

“We are the mandatory challenger, Mr. Sulaiman has just confirmed it. We knew we were going straight to the title, we just waited to find out who would win that fight between Russell and Magsayo and since Magsayo is the new champion, then we are going against him,” dason pa ni Vargas.

“I can’t ask for anything more. Going straight for the title against Magsayo makes me feel, very, very happy,” dugang pa sa Meksikano.

Kon ugaling way kakulian nga maabot ug madayon ang plano, usa kini ka kulbahinam ug eksplosibong engkuwentro tali sa duha ka way pildeng mga kampiyon.

Si Magsayo nagkupot og perpektong 24-0 record uban ang 16 knockouts samtang ang 31-anyos nga si Vargas wala pa say pilde sa 35 ka away uban ang 22KOs.

Sa laing bahin, si MP Promotions President Sean Gibbons, ang promoter ni Magsayo, miangkon nga si Russell angay hatagan og rematch.

 “I would say Gary absolutely deserves a rematch,” padayag pa ni Gibbons ngadtong Keith Idec sa BoxingScene.com. “He fought gallantly. He fought through a lot of stuff with his father, with his brother’s passing, the injury he sustained in the fight. So, I wanted to say to everybody I believe he deserves a rematch, if it fits into the schedule, and that he’s a classy guy. He really is, man. The guy showed up, fought hurt or whatever it was, so I like the Russell family. I really do.”