Cavs gisurprisa ang Bucks

CEBU, Philippines — Gipahagba sa Cleveland Cavaliers ang defending champion Milwaukee Bucks, 115-99, aron pagkatkat niini sa ikaupat nga puwesto sa NBA Eastern Conference kagahapon. Si Kevin Love maoy nangu sa Cavs uban ang 25 puntos inabagan ni Cedi Osman nga mitali og 23 puntos.

Wala sab magpabitin si Darius Garland nga mikimada og 19 puntos ug walo ka assists ug ingon man si Evan Mobley nga miamot og 16 puntos alang sa Cavs nga midaog sa ikawalong higayon sa miagi nilang siyam ka duwa.

Si Giannis Antetokounmpo mihipos og 26 puntos, samtang sila si Bobby Portis ug Khris Middleton nagkumboya og 43 puntos alang sa Bucks nga igo lamang nakalabaw og 12 puntos sa unang kuwarter apan wala na makabawi pa human ma-alkansi og otso puntos sa halftime.

Didto sa Miami, si Duncan Robinson mitimbre og 25 puntos samtang sila si Jimmy Butler ug Tyler Herro nagkumbinar og 43 puntos sa dihang  gipaksit sa Miami Heat ang New York Knicks, 110-96.

Tungod niini, padayong nag-una ang Heat sa East standings ug gisundan kini sa Chicago Bulls nga mipayaka sa Toronto Raptors, 111-105.

Sa laing resulta, ang Brooklyn Nets miyukbo ngadto sa Denver Nuggets, 124-118. Si Nikola Jokic maoy bida sa Nuggets bitbit ang 26 puntos ug 10 ka rebounds. Ang Nets miduwa nga wala ang ilang Big 3 nga sila si Kevin Durant, Kyrie Irving, ug James Harden.

Sa laing bahin, si Kelly Oubre milansang og 10 ka 3-pointers sa iyang career-high 39 puntos samtang si LaMelo Ball mirehistro og triple-double uban ang 29 puntos, 13 ka assists ug 10 jka rebounds sa dihang gilampaso sa Charlotte Hornets ang Indiana Pacers, 158-126.