Pultahan sa PBA sirado na sab sa mga fans

CEBU, Philippines — Ipadayon ang aksiyon sa PBA Governors' Cup apan wala na say mga fans nga makatan-aw sud sa binyu.

Mao kini ang senaryo nga gipadayag ni PBA commissioner Willie Marcial sa pagbalik unya sa mga duwa sa PBA sa unang semana sa Pebrero labing sayo.

"Yung fans hindi na muna. Siguro after a couple of weeks, pag-aralan natin kung talagang puwede na tsaka natin i-accommodate ang mga fans," matud pa ni Marcial. "Pero sa simula baka wala muna."

Kining maong kalamboan naabot usa ka bulan sukad ang PBA midawat og balik sa ilang mga fans sud didto sa Smart Araneta Coliseum.

Miabot gani ngadto sa dul-an 5,000 ka mga tawo ang mitan-aw sa mga duwa atol sa adlaw sa Pasko diin nag-abot ang Barangay Ginebra Kings ug Magnolia Hotshots sa main game.

Si Marcial nagkanayon nga ila usa timbang-timbangon ang sitwayson aron pagdetermina kon kanus-a sila mo-akomodar balik og live audience.

"Depende pa rin kasi nakikita naman natin pababa yung mga cases," batbat pa ni Marcial.

Sa pagka karon, si Marcial nagkanayon nga ang pag-praktis og balik sa mga teams mao usa ang ilang giatiman agi'g pangandam sa pagtiwas sa nahunong nga Governor's Cup.

"Scrimmages muna ang inaasikaso natin," dason pa ni Marcias. "Kung mai-baba pa yan, baka puwede na tayong mag-request na masimulan na ang mga laro."