Lakers gibugha ang Nets

CEBU, Philippines — Si LeBron James mipatuasik og 33 puntos samtang si Anthony Davis mibalik aron palig-onon ang ilang puwersa sa dihang gipakaging sa Los Angeles Lakers ang Brooklyn Nets, 106-96, sa NBA kagahapon didto sa Barclays Center sa Brooklyn, New York.

Ang four-time champion nga si James milangkat sab og pito ka rebounds ug mipasa og unom ka assists sa Lakers nga katulo pa lamang makadaog sa miagi nilang walo ka duwa.

Si Davis, nga miduwa sa unang higayon sukad nayayay ang iyang tuhod atol sa 110-92 nilang kaparotan ngadto sa Minnesota Timberwolves niadtong Disiembre 17, mihipos lamang og otso puntos apan ang iyang presensiya way duga nga nakapadasig sa Lakers.

"Just his presence impacts this ball club," dason pa ni James.

Gawas ni James, lain pang tulo ka players ang mikuha og atensiyon sa kampo sa Lakers. Si Malik Monk miposa og unom ka tres sa iyang 22 puntos, samtang sila si Russell Westbrook ug Carmelo Anthony nagkumboya og 28 puntos.

Ang Nets nahagba nga wala ang duha nila ka superstars nga sila si Kevin Durant ug Kyrie Irving.

Ang laing sakop sa gikaintapang Big 3 sa Brooklyn nga si James Harden mirehistro og triple-double uban ang 33 puntos, 12 ka rebounds ug 11 ka assists apan dili kini igo paglikay sa Nets nga masugamak na sab ngadto sa kaparotan.