Nagkayong suns mipayaka sa Jazz
CEBU, Philippines — Si Chris Paul mitagak og 15 sa iyang 27 puntos sa katapusang kuwarter samtang si Devin Booker mipabuto og 33 puntos sa dihang gipayaka sa miratsadang Phoenx Suns ang Utah Jazz, 115-109, sa NBA kagahapon didto sa Footprint Center sa Phoenix, Arizona.
Hapit maka-triple double ang 36-anyos nga si Paul, nga mikolekta sab og 14 ka assists ug siyam ka rebounds alang sa Suns.
Gawas nga mikadlit sa ikapito nilang sagunson nga daog, giinat sab sa Suns ang labing nindot nga record ning NBA season ngadto sa 37-9.
Ang Jazz nalubong og 13 puntos sa first half apan milusad og mainit nga resbak hinungdan nga nakagukod kini ug nakalabaw pa gani ko kuwatro puntos, 95-91, sa sayong bahin sa katapusang kuwarter.
Apan ang Suns mitubag pinaagi sa nagkayong 14-2 rally aron kontrolahon og balik ang duwa sa hingpit.
Si Fil-Am Jordan Clarkson maoy nangu sa Jazz uban ang 22 puntos.
Ang Jazz miduwa nga wala ang tulo nila ka mga bitoon nga sila si Donovan Mitchell, Rudy Gobert ug Mike Conley hinungdan nga naparot sa ikawalong higayon sa miagi nilang 11 ka duwa.
Sa laing duwa, si Darius Garland miposa og krusyal nga tres sa pinal nga 83 segundos aron agakon ang Cleveland Cavaliers ngadto sa 95-93 nga kadaogan batok sa New York Knicks.
Si Garland mitapos uban ang 13 puntos ug 12 ka assists.
Ang beteranong forward nga si Kevin Love miposte og 20 puntos, si Evan Mobley dunay 15 puntos ug 12 ka rebounds, samtang si Isaac Okoro mitali og 14 puntos alang sa Cavs nga kapito na midaog sa katapusan nilang walo ka aksiyon.
Sila si RJ Barrett ug Julius Randle nagkumboya og 42 puntos alang sa Knicks nga napukan sa ikaupat nga higayon sa miagi nilang lima ka duwa.
Duna pa untay tsansa nga modaog ang Knicks apan wala masud ang giitsa nga 3-pointer ni Randle dayong kapupos sa oras.
- Latest