Bucks guard gisuspenso sa NBA
CEBU, Philippines — Si Milwaukee Bucks guard Grayson Allen gisuspenso og usa ka duwa sa NBA tungod sa pagbuak niini sa pulso ni Alex Caruso sa Chicago Bulls atol sa ilang sangka niadtong Sabado didto sa Fiserv Forum sa Milwaukee.
Ang mga opisyal sa liga nakahukom nga silotan si Allen human siya gitawgan og Flagrant 2 foul sa mga reperi sa ikatulong kuwarter sa maong duwa diin ang Bucks midaog, 94-90. Si Allen na-ejected tungod sa iyang gibuhat.
Sa dihang si Caruso naglutaw sa hangin padung sa usa ka fast-break layup sa nahibilin nga 5:45 sa ikatuilong kuwarter, kalit lang nga gibira ni Allen ang iyang mga kamot ug gipaamanan pa niini og makusog nga hapak hinungdan sa pagkahagsa sa Bulls guard ngadto sa sawog.
Si Caruso nakahiagum og bali sa tuo niining pulso hinungdan nga dili kini makaduwa gikan sa unom ngadto sa walo ka semana.
Sila si Caruso ug Bulls coach Billy Donovan parehong mikondena sa dili makiangayon nga binuhatan ug hugaw nga dinuwaan ni Allen. Alang kanila, kuwang ra ang usa ka duwa nga suspensiyon sa delikado kaayong gihimo ni Allen.
"Dude just grabbed me out of the air," matud pa ni Caruso. "I don't know what else you can do about it. I'm just glad that I didn't have any major scary injuries right away."
- Latest
