Suns gipayaka ang Mavs

CEBU, Philippines — Si Devin Booker mitali og 28 puntos samtang si Chris Paul midugang og 20 puntos ug 11 ka assists sa dihang gitumba sa nagharing Phoenix Suns ang Dallas Mavericks, 109-101, sa NBA kagahapon.

Ang Suns nabiyaan og 12 puntos sa ikatulong kuwarter apan milusad og nagkayong resbak sa naghinapos nga bahin sa duwa aron patikalbongon ang Mavs.

Katapusang nakasikit ang Mavs sa iskor nga 99-101 gumikan kay si Bismack Biyombo mipasud sa iyang free throw ug dunk sa wala pa miposa og tres si Paul nga nagsilyo sa daog sa Suns, 107-99, sa pinal nga 26 segundos.

Tungod niini, gipahugtan sa Suns ang ilang pagkupot sa solong liderato bitbit ang 35-9 record.

Si Luka Doncic dunay 28 puntos, walo ka rebounds ug walo ka assists apan nahoyhoy ang abaga gumikan kay napakgang ang upat ka sagunson nga daog sa Dallas. Si Jalen Brunson mi-iskor og 19 puntos samtang si Kristaps Porzingis mikulit og 18 puntos ug 11 ka rebounds alang sa Mavs nga natagak ngadto sa 26-20.

Sa laing aksiyon, si Jonas Valanciunas mipupo og 18 puntos ug 10 ka rebounds aron pangulohan ang New Orleans Pelicans ngadto sa 102-91 nga kadaogan batok sa New York Knicks.

Dominante kaayo ang Pelicans nga sa usa ka higayon mi-abante og 25 puntos dayon na ngadto sa pagpatilaw sa Knicks sa ikatulo niining sunod-sunod nga pilde didto sa Madison Square Garden.