Wolves gitangag ang Knicks

CEBU, Philippines — Sila si Anthony Edwards ug Karl Anthony-Towns nagkumboya og 41 puntos aron agakon ang Minnesota Timberwolves ngadto sa 112-110 nga kadaogan batok sa New York Knicks sa NBA kagahapon didto sa Madison Square Garden sa New York. Ang Timberwolves mikolapso human nakalabaw og 12 puntos apan namawi sa hilimatyong minutos diin ilang giwani ang Knicks, 10-3, aron angkonon ang ikaunom nilang daog sa miagi nilang walo ka duwa. Dako sab og naambag si D'Angelo Russell nga dunay 17 puntos ug ingon man si Jaylen Nowell nga miamot og 14 puntos sa Wolves.

Si Evan Fournier mipabuto og 27 puntos samtang si Julius Randle mipupo og 21 puntos, siyam ka assists ug siyam ka rebounds apan nakawang ang ilang paningkamot gumikan kay ang Knicks nabuntog sa ikalimang higayon sa miagi nilang 13 ka pagtaak sa korte.

Si RJ Barrett mitapos uban ang 17 puntos sa Knicks nga nasugamak tungod sa 18 nila ka turnovers.Mi-abante pa unta sila og singko puntos, 91-86, human sa tulo ka kuwarter gamit ang 18-8 run apan wala kasagang sa mainit nga resbak sa Wolves sa naghinapos nga bahin sa kulbahinam nga aksiyon.