Duha ka misyon pas-anon ni Marcial

CEBU, Philippines — Nakabalik na ang Pinoy'ng boksidor nga si Eumir Felix Marcial sa Amerika ug sugdan dayon niini ang hugtanon niyang preparasyon alang sa duha ka mahinungdanong tahas nga nag-atang kaniya sa unahan.

Unang atimanon sa Tokyo Olympics bronze medalist ang iyang training camp didto sa Wild Card Gym Los Angeles uban ni Hall of Fame trainer Freddie Roach agig pangandam sa ikaduha niyang pagkatkat sa ring isip pro karong Abril.

“Finally, I can now fully focus on my training. I was told to prepare for a scheduled outing. I need to be in excellent shape because I want to get back in the ring soon and also make myself available for the national team by May,” matud pa ni Marcial, nga mipukan sa Amerikanong si Anrew Whitfield pinaagi sa desisyon sa iyang pro debut niadtong Disiembre 2020 didto sa LA.

Gikan sa LA, ang 26-anyos nga si Marcial molabyog sa Las Vegas aron magbansay-bansay uban sa tinamod nga conditioning coach nga si Angel Memo Heredia sa ikaduhang semana sa Pebrero, butang nga gihakahinaman og maayo sa Zamboangeño   Olympian.

"I thank Sir Sean (Gibbons) and Senator Manny (Pacquiao) for making sure I get the best possible team here in the US. I know a lot of great things that coach Memo has done that’s why it excites me a lot that I will also be under Memo’s program,” dason pa ni Marcial.

Gawas sa umaabot niyang away, buot sab ni Marcial nga morepresenta sa Pilipinas sa 31st Southeast Asian (SEA) Games karong Mayo 12-23 didto sa Hanoi, Vietnam.         

Kon ugaling madayon, laraw ni Marcial nga sakmiton ang ikaupat niyang sagunson nga gold medal sa rehiyonal nga torneyo nga mahitabo kausa lamang sud sa duha ka tuig.