Bucks gikastigo ang Warriors

CEBU, Philippines — Si Giannis Antetokounmpo mipaulbo og 30 puntos sa iyang triple-double sa dihang gilampaso sa defending champion Milwaukee Bucks ang Golden State Warriors, 118-99, sa NBA kagahapon didto sa Fiserv Forum sa Milwaukee, Wisconsin.

Ang two-time MVP nga si Antetokounmpo midugang og 12 ka rebounds ug 11 ka assists sa ikatulo niyang triple-double karong season ug ika-28 kinatibuk-an sa iyang    karera.

Dominante kaayo ang gikaintapang "Greek Freak" nga mibugwak og 23 puntos sa nag-unang duha ka kuwarter aron tabangan ang Bucks pagposte og makalisang nga 39 puntos nga labaw sa halftime, 77-38.

Mikuha sab og atensiyon si Khris Middleton uban ang 23 puntos ug ingon man si Bobby Portis nga mikimada og 20 puntos alang sa Bucks.

Wala kaugpo ang alas sa Warriors nga si Stephen Curry, nga na-angklahan ngadto lamang sa 12 puntos sa labing makapadismaya nilang kapildihan ning season.

Didto sa Memphis, sila si Desmond Bane ug Jaren Jackson Jr. nagkumboya og 41 puntos sa dihang gipakaging sa Grizzlies ang Minnesota Timberwolves, 116-108, alang sa ika-11 nilang sagunson nga daog. Wala sab magpabitin si Ja Morant nga miamot og 16 puntos, siyam ka assists ug walo ka rebounds. Sa laing resulta, si Shai Gilgeous-Alexander mi-iskor og 33 uban ang 10 ka rebounds ug siyam ka assists sa dihang gipakgang sa Oklahoma City Thunder ang lima ka sunod-sunod nilanvg pilde human gipayaka ang Brooklyn Nets, 130-109.