Bag-ong nawong sa Cebu motocross Andales nagpursige aron damgo makab-ot

CEBU, Philippines — Dili niya mahikalimtan ang usa ka hitabo sa iyang kinabuhi sa dihang gidala siya sa iyang amahan nga si Joselito sa usa ka lumba sa motor sa North reclamation area pipila ka tuig na ang milabay.

Nag-edad pa lamang siya og singko anyos niadtong tungora apan didto na nagsugod og kahulma ang pangandoy ni Eugene Andales nga mamahimong rider sa umaabot.

"Ganahan gyud ko’g extreme sports niadtong bata pa ko,” kumpisal pa ni Andales. “Five years old pa lang ko sa dihang first time ko nakakita og motocross racing event ug maka-ingon ko nga love  at first sight gyud to. Dili nako makatug sukad adto.”

Apan kay walay ikapalit og motor tungod sa kawad-on sa ilang pamilya, gitago lamang sa hilom ni Andales ang iyang ambisyon sa iyang dughan.

Mao kini ang hinungdan nganong nagpursige siya sa kinabuhi. Aron makatigum og kuwarta, iyang gisudlan ang bisan unsang trabaho apan ang iyang pagka-barista maoy nagdalit kaniya og maayong palad.

Nagsugod kini sa dihang iyang nahimamat Rhea Mantuhac sa usa ka coffeee shop niadtong 2016. Ang ilang kaminyoon maoy nahimong yawe ni Andales aron makab-ot niya ang iyang damgo.

Apan gihatag kini kaniya dili sa sayon nga paagi. Sud sa tulo ka tuig, puwerti niyang hinangyo sa iyang kapikas nga tugtan siya nga sudlon ang kalibutan sa motocross nga iyang gikahiligan og maayo.

Og sa kadugayan niadtong Disiembre sa miaging tuig, gidungog na gyud sa iyang asawa ang iyang mga pangaliyupo.

“Dili masukod ang gibati nakong kalipay nga misugot na gyud ang akong misis human sa tulo ka tuig nakong hinangyoay. Damgo gyud to nga natuman para nako,” paambit pa ni Andales, nga mitabang karon ni Rhea pagduma sa nagtubo nga patigayon sa ilang pamilya ubos sa Duros Development Corporation nga naglangkob sa Woodlands Resort Communities ug Liloan Golf and Leisure Club.

Human sa kanunay niyang pagpraktis sa nagkadaiyang racetrack sa Danao, Liloan ug Consolacion, si Andales naka-angkon og dugang kompiyansa sa iyang kaugalingon human iyang maila-ila ug nahimong higala si BJ Enage-Pepito, ang gibansagan nga "Wonder Boy" gikan sa Daanbantayan nga usa sa labing bangiitan ug labing malampuson nga riders sa kasaysayan sa Cebu motocross.

“Sa iyang edad nga 19 years old pa lamang, na-amaze gyud ko sa ablidad ni BJ. Maayo gyud kaayo,” dason pa ni Andales. “Apan labing mapasalamaton ko nga iya kung gi-guide ug gitagaan og mga advice unsaon pag-develop sa akong skills. Daghan ko og nakat-onan niya ug siya maoy himoon nakong inspirasyon sa akong pag-test sa akong kaugalingon kon usa gyud ko kutob.”

Bisan og bag-o pa siyang milumba, si Andales mihimo gilayon og kasikas gumikan kay kanunay man siyang ma-apil sa top 5 ubos sa novice/beginners division sa tulo ka mga karera nga iya nang naapilan didto sa Danao, Barili ug Tuburan.

Si Andales matawag nga usa ka late bloomer gumikan kay sa edad nga 29 anyos, karon pa lamang siya nagsugod paghimo og pangan sa natad sa motocross dinhi sa Sugbu.

Apan alang ni Andales, dili basihan ang edad kon ikaw determinado nga gukdon ang gihandum sa imong kasingkasing ug motagamtam og kalampusan sa kinabuhi.

"Way bata ra kaayo o tiguwang na kon magsugod ka sa usa ka butang ug mokab-ot sa imong gitinguha,” kanayon pa ni Andales. “Kon imo gyud ning calling, moabot gyud ni nimo. Kinahanglan nga patient lang ka, humble, ug dili gyud mo-give up. Kinahanglan duna kay motivation ug passion nga ma-angkon ang imong gusto gumikan kay sa kinabuhi ang labing importante mao nga malipayon ka sa imong gibuhat.”