Lakers nakaipsot sa Spurs; Warriors pabiling way pilde

CEBU, Philippines — Ang Los Angeles Lakers miduwa nga wala si LeBron James apan sila si Anthony Davis ug Russell Westbrook mibanat og maayo hinungdan nga ilang napiog ang San Antonio Spurs, 125-121, sud sa overtime sa NBA kagahapon didto sa AT&T Center sa Texas.

Si Davis mitapos uban ang 35 puntos, 17 ka rebounds ug upat ka assists samtang si Russell Westbrook mikolekta og 33 puntos, 10 ka rebounds ug walo ka assists alang sa Lakers.

Nakuyawan hinoon kadiyot ang Lakers human si Davis, nga duna nay gipamati daan sa tuo niining kiting, nalup-og sa korte samtang nagkupot sa tuo niining tuhod sa naghinapos nga bahin sa katapusang kuwarter.

Nakarekober ra hinoon si Davis aron tabangan ang Lakers nga pildihon ang Spurs sa duhang singko minutos sa aksiyon.

Didto sa Oklahoma City, si Stephen Curry mi-iskor og 23 uban ang unom ka rebounds ug upat ka assists samtang si Andrew Wiggins miamot og 21 puntos sa dihang gipakaging sa Golden State Warriors ang Oklahoma City Thunder, 106-98, aron pagpabilin niining way pilde sud sa upat ka duwa.

Ang Warriors nabiyaan og 11 puntos sa halftime, 59-48, apan dominante kaayo sa ikatulong kuwarter diin ilang gilampaso ang Thunder, 33-17, nga maoy nahimo nilang yawe sa kalamposan. Didto sa Madison Square Garden, gipakgang sa New York Knicks ang 15 ka sagunson nilang pilde batok sa Philadelphia 76ers, 112-99.

Sila si Kemba Walker, Evan Fournier ug Julius Randle nagkumboya og 53 puntos alang sa Knicks nga mibuntog sa Sixers sa labing unang higayon sukad niadtong Abril 2017.

Si Tobias Harris mibubo og 23 puntos alang sa Sixers nga padayong nag-adjust nga wala si Ben Simmons, kansang ugma uban sa team hangtud karon wala pay klaro.