Bucks gipayaka ang pacers

CEBU, Philippines — Si Giannis Antetokounmpo mipupo og 30 puntos, 10 ka rebounds ug siyam ka assists sa dihang gitak-opan sa Milwaukee Bucks ang tulo nila ka sunod-sunod nga road games pinaagi sa 119-109 nga pagpakaging sa Indiana Pacers sa NBA kagahapon didto sa Gainbridge Fieldhouse sa Indianapolis, Indiana.

Wala sab magpabitin si Khris Middleton nga mikadlit og 27 puntos alang sa Bucks, nga milusad og 11-2 run pagkahuman sa ikaduhang kuwarter nga nahimo nilang taytayan ngadto sa kadaogan. Ang defending champion naglabaw og 18 puntos sa usa ka higayon ug wala na molingi pa sukad niadto.

"It was really aggressive Giannis tonight," matud pa ni Milwaukee coach Mike Budenholzer agig pagdayeg sa alas niyang gibansagan nga "Greek Freak". "At the same time, he (was) making reads, making great passes. When he's attacking like that, that's when we are at our best. He had that extra gear tonight."

Si Malcolm Brogdon mihipos og 25 puntos samtang si Domantas Sabonis dunay 21 puntos ug 13 ka rebounds alang sa pilderong Pacers.

Didto sa Barclays Center sa New York, si Kevin Durant mitali og 25 puntos sa dihang gilampaso sa Brooklyn Nets ang Washington Wizards, 104-90.

Si Durant, nga mipasud og siyam sa 17 niya ka itsa, mikolekta sab og walo ka rebounds ug upat ka assists.

Gi-abagan siya ni Patty Mills nga mi-iskor og 21 puntos. Nagparamdam sab silang James Harden ug Bruce Brown nga miamot og 14 puntos matag usa alang sa Nets.

Nangu sa nasugamak nga Wizards mao si Bradley Beal uban ang 19 puntos. Sila si Daniel Gafford, Kentavious Caldwell-Pope ug Aaron Holiday nagkumbinar og 35 puntos sa pilderong kawsa.

Sa laing aksiyon, si DeMar DeRozan mipabuhagay og 26 puntos aron pangulohan ang Chicago Bulls ngadto sa 111-108 nga kadaogan batok sa kanhi niya team nga Toronto Raptors.