Bucks namawi
CEBU, Philippines — Si Khris Middleton mikadlit og 28 puntos sa dihang gipaluhod sa defending champion Milwaukee Bucks ang San Antonio Spurs, 121-111, sa NBA kagahapon didto sa AT&T Center sa Texas.
Midugang si Giannis Antetokounmpo og 21 puntos alang sa Bucks nga migamit og mainit nga opensiba sa katapusang kuwarter aron makabawi human sila gilampaso sa Miami Heat sa miaging duha ka gabii.
"Just find a way to bounce back," dason pa ni Middleton. "It's just how you adjust, how you respond to that. I think tonight, for the most part, the effort was in the right place."
Dako sab og natampo sila si Jrue Holiday ug Pat Connaughton nga dunay 16 puntos matag usa ug ingon man sila si George Hill ug Grayson Allen nga nagkumboya og 25 puntos alang sa Buck, nga wala na molingi pa sukad miposte og 101-91 og labaw sa nahibiling 8:40 sa duwa.
Sa laing aksiyon, ang Cleveland Cavaliers miposte sa una nilang daog ning lab-as pa nga NBA season human gibalian og pako ang Atlanta Hawks, 101-95, ubos sa pagpangu ni Ricky Rubio nga mipaulbo og 23 puntos.
Ang rookie nga si Evan Mobley nagparamdam sab uban ang 17 puntos ug 11 ka rebounds. Si Jarrett Allen dunay 11 puntos ug 14 ka rebounds, samtang sila si Collin Sexton, Kevin Love ug Lauri Markkanen parehong mitali og 12 puntos alang sa Cavs nga mipakgang sa duha ka sunod-sunod nilang pilde.
Si Trae Young mihipos og 24 puntos samtang si Cam Reddish midugang og 19 puntos sa pilderong hawks.
Didto sa Toronto, si Luka Doncic mikolekta og 27 puntos, 12 ka assists ug siyam ka rebounds sa dihang gimakmak sa Dallas Mavericks ang Raptors, 103-95. Si Tim Hardaway miamot og 25 puntos alang sa Mavericks nga mireshitro sa una nilang daog human mahagba sa mga kamot sa Hawks.
- Latest