Herro bayani sa Heat

CEBU, Philippines — Si Tyler Herro mipabuto og 27 puntos sa dihang ang Miami Heat mikulit og club record alang sa labing daghan puntos sa usa ka season-opening game human ilang gilat-an ang defending champion Milwaukee Bucks, 137-95, sa NBA kagahapon.

Mihimo sab og kasikas si Jimmy Butler uban ang 21 puntos samtang si Bam Adebayo milangkat og 13 ka rebounds alang sa Heat nga milusad og nagkayong 26-2 rally sa unang kuwarter aron ilampornas ang Bucks.

Ang miaging record nga 128 puntos sa Heat ilang narehistro batok sa Detroit Pistons niadto pang 1999. Ila sab nga gipalabwan ang labing dako nilang daug nga 26 puntos batok sa Orlando Magic niadtong 2000.

Ang six-time All-Star nga si Kyle Lowry nalimitahan ngadto lamang sa singko puntos sa labing una niyang duwa sa Heat.

Si Giannis Antetokounmpo dunay 15 puntos ug 10 ka ka rebounds samtang si Khris Middleton mitali lamang og 10 puntos alang sa pilderong Bucks. Miduwa hinuon sila nga wala ang pipila ka sinaligan nilang players nga sila si Jrue Holiday, Brook Lopez, ug Bobby Portis nga pulos dunay angol.

Sa laing bahin, si Stephen Curry milansang og duha ka krusyal nga tres sa iyang 45 puntos aron agakon ang Golden State Warriors ngadto sa 115-113 nga kadaugan batok sa Los Angeles Clippers.

Mikuha sab og atensiyon si Trae Young nga mikadlit og 19 puntos ug 14 ka assists sa dihang gidagit sa Atlanta Hawks ang Dallas Mavericks, 113-87.

Si Luka Doncic mipupo og 18 puntos, 11 ka rebounds ug pito ka assists alang sa Mavs, kansang bag-ong coach nga si Jason Kidd gisugat og pilde.