CFC malaumon PFL Season 2021 madayon
CEBU, Philippines — Nagpabiling malaumon ang bag-ohay pang natukod nga Dynamic Herb Cebu Football Club nga mahinayon ang pagpahigayon sa Philippine Football League (PFL) Season 2021 human ang gikatakdang pagbukas niini karong Oktubre 27, gisibog na sab ngadto sa unang semana sa Nobiyembre didto sa PFF National Training Center sa Carmona, Cavite.
Si head coach Oliver "BingBing" Colina miangkon nga lisud kaayo sa bahin sa coaching staff ug ingon man sa management nga ipabilin ang kasadig sa tibuok team ning puntoha ilabi na kay ang pagpakita sa ilang abilidad sa usa ka kompetisyon maoy ilang gilantaw sa unahan.
"I feel bad for the players because they are all down. Motivation is low, but we the coaches and management are doing our best to keep them motivated and uplift their spirits," matud pa ni Colina.
Sigun sa orihinal nga iskedyul, ang PFL Season 2021 sugdan unta niadtong Agosto apan pipila ka higayon na kining nasibog nga resulta sa mga lockdowns tungod sa padayon nga pagsaka sa mga kaso sa Covid-19 nga gimugna sa Delta variant.
Bisan pa man niini, ang mga sakop sa CFC padayon nga nanikaysikay sa ilang praktis aron magpabilin ang ilang kondisyon ug kaandam nga mopakita'g aksiyon mao nang kalit nga nangahoyhoy ang ilang abaga sa dihang nasayud nga giuswag na sab ang giatngan nilang pagsugod sa torneyo.
"A lot players have been affected with the constant rescheduling, not only players, the whole squad even the coaches and also the management," dason pa Colina. Taliwala niining tanan, si Colina nanghinaut nga madayon ang pagpahigayon sa PFL Season 2021 sud niining tuiga.
- Latest
