NBA 75th anniversary team gipaila-ila
CEBU, Philippines — Sila si Michael Jordan, Oscar Robertson, Wilt Chamberlain, Bill Russell, LeBron James ug anhing Kobe Bryant maoy nangu sa listahan sa mga bangiitang players nga naglangkob sa NBA 75th anniversary team nga pormal nga gipahibawo sa liga kagahapong adlawa.
Sa kinatibuk-an, ang mga miyembro sa team nakadaug og 158 ka kampiyonato ug nakakuha og 730 ka All-Star selections.
Kadtong mga gitahasan sa pagboto gipapili og 75 sa labing ngilngig nga players sa kasaysayan sa NBA apan ang liga nakalista og 76 imbes nga 75. Wala hinuon nila gi-rank ang mga players sa numero o posisyon.
Unom sa nahagpat mga langyaw nga magduduwa gikan sa unom nga nasud nga mao sila si Giannis Antetokounmpo (Greece), Patrick Ewing (Jamaica), Steve Nash (Canada), Dirk Nowitzki (Germany), Hakeem Olajuwon (Nigeria) ug Tim Duncan (US Virgin Islands).
Onse ka aktibong mga players ang nalakip sa lista nga sila si Antetokounmpo, James, Carmelo Anthony, Stephen Curry, Anthony Davis, Kevin Durant, James Harden, Kawhi Leonard, Damian Lillard, Chris Paul ug Russell Westbrook.
Ang nga miboto gilangkoban og pipila ka mga kanhi ug kasamtangang NBA players nga naapil sab sa team sama nilang Rick Barry, Julius Erving, Stephen Curry, ug Scottie Pippen.
- Latest