Chooks 3X3 basketball: ARQ Builders dunay misyon

CEBU, Philippines — Ang ARQ Builders Cebu dunay misyon ug kini way lain kondili ang paglangkat sa kampiyonato sa 2021 Chooks-to-Go Pilipinas 3x3 Invitational nga duwaon karong adlawa didto sa Laus Events Centre sa San Fernando, Pampanga.

Si ARQ coach Jerry Guzman Abuyabor miangkon nga malisud nga hagit ang ilang sagubangon gumikan kay gawas nga lig-on ang ilang mga kontra, giimbita sila nga moslamot sa torneyo sud lamang usa ka semana nga pahibalo.

Gipasalig hinoon ni Abuyabor nga buhaton nila tanan kutob sa ilang mahimo aron makab-ot ang gihandum nilang titulo.

“Malalakas rin kalaban but knowing the boys we got, bagay sila sa 3x3,” matud pa ni Abuyabor nga kasamtangang konektado sa Southwestern University (SWU)-Phinma Cobras. “They have one mission for the day and that is to win the championship. I know the boys will do their best.”

Mopakita’g aksiyon sa ARQ Builders ubos sa pagtimon ni Abuyabor mao ang mga kanhi Cebu Schools Athletic Foundation, Inc. (CESAFI) All-Stars nga sila si Frederick Elombi (UC), RJ Dinolan (USJ-R), ug Landy Sanjo ug Monbert Arong (SWU-Phinma).

“It’s my first experience in 3x3 basketball but I’m ready as always,” dason pa ni Dinolan, nga migiya sa USJ-R Jaguars ngadto sa duha ka sagunson nga pagtaak sa CESAFI finals ugaling lang kay napukan sila sa maong mga higayon sa UV Green Lancers niadtong 2017 ug 2018. “I’m privileged to be part of the Cebu team and I will do my best.”

Naglakip sa labing lig-on nga mga karibal sa ARQ sa usa ka adlaw nga kompetisyon mao ang HeiHei Manila nilang ex-CESAFI MVP Mark Jayven Tallo, Chico Lanete, Zachy Huang ug Mike Nzeusseu ug ang Homegrown Grains Bocaue nilang ex-PBA player Mark Yee, Dennis Santos, Ralph Tansingco, ug Jayvee Marcelino.

Ang ubang mga partisipante mao ang Pacquiao Coffee Bacolod, RBR Cabiao Nueva Ecija, BRT Sumisip Basilan, Pasig Kingpins, Adam Esli Pasay, MNL Kingpin Quezon City, Amacor Mandaluyong, Essen Immunoboost Sarangani, ug Zamboanga Valientes.

Ang makampiyon mobulsa og P100,000, samtang ang mopahiluna sa ikaduha ug ikatulong dapit makadawat og P50,000 ug P20,000.